افغانستان ژورنالیستلر مرکزی طالبلر اخبارات و مدنیت وزیرلیگی کمیده اۉنته یېتکرمه و ژورنالیستیک تشکیلاتنینگ فعالیتینی بېکار قیلگنینی معلوم قیلدی.
مرکز تیناوون (دوشنبه،۶ دلو) نشر قیلگن بیاناتیده بو قرارنی قارهلب، اونی سۉز و مطبوعات اېرکینلیگینی باستیریشنینگ دوامي باسقیچی همده یکّه آواز سیاستی دایرهسیدهگی حرکت، دېب بهالهدی.
افغانستان ژورنالیستلر مرکزی بیاناتیگه کۉره، فعالیت جوازی بېکار قیلینگن تشکیلاتلرنینگ اکثریتی اوّلگی حکومت دوریده رخصتنامه آلگن بۉلیب، طالبلر چېکلاولری سببلی حاضر ژورنالیستلر و یېتکرمه خادملرینی تیارلش یۉنهلیشیده فعالیت یوریتیب کېلهیاتگن اېدی.
مرکزنینگ تاکیدلشیچه، طالبلر اخبارات و مدنیت وزیرلیگی فقط ژورنالیستلر خوفسیزلیگی کمیتهسی همده یقینده تشکیل اېتیلگن ایکّی مؤسسه، «افغانستان ژورنالیستلری و عامهوي اخبارات واسطهلرینی قۉللب-قوّتلش جمغرمهسی» و «افغان مطبوعات مرکزی»گه فعالیت یوریتیشگه رخصت بېرگن.
طالبلر اخبارات و مدنیت وزیرلیگی بوگون نشر قیلگن بیاناتیده اوچ تشکیلاتدن تشقری، ژورنالیستلر و یېتکرمهنی قۉللب-قوّتلاوچی باشقه برچه مؤسسهلرنینگ فعالیت جوازی بېکار قیلینیشینی معلوم قیلدی.
مذکور وزیرلیک کۉپلب بوندهی تشکیلاتلر ژورنالیستلر معمالرینی حل قیلیش اۉرنیگه، عکسینچه، اولرنینگ معمالرینی ینه-ده کۉپهیتیرهیاتگنینی دعوا قیلدی.
طالبلر افغانستانده ینه حاکمیتنی قۉلگه آلگنیدن بویان عامهوي اخبارات واسطهلری، ژورنالیستلر و اولرنی قۉللب-قوّتلاوچی تشکیلاتلر فعالیتیگه کېنگ قمراولی چېکلاولر جاري اېتیب کېلماقده.
بو گروه اوّل هم بیر نېچه بار یېتکرمه ادارهلریگه باستیریب کیرگن، ژورنالیستلر و خادملرنی حبسگه آلگن همده بو ادارهلرنی یاپیب قۉیگن.
