منبعلرگه کۉره، ننگرهار ولایتیده بیر عایلهنینگ اعضاسی بۉلگن تۉرت باله دریاگه توشیب کېتیشی عاقبتیده هلاک بۉلگن.
کامی اولسواللیگی یشاوچیلریدن بیرینینگ ایتیشیچه، اوشبو حادثه شنبه کونی (۴ دلو) کامی اولسواللیگی «تری» منطقهسیده یوز بېرگن.
اونینگ سۉزلریگه کۉره، بیر عایله دَم آلیش اوچون کنر دریاسی بۉییگه بارگن و تۉرت باله صورتگه توشیش پیتیده سووگه توشیب کېتیب، چۉکیب کېتگن.
منبعنینگ ایتیشیچه، بالهلر۶ یاشدن۱۲ یاشگچه بۉلگن، ایکّی قیز و ایکّی اۉغیل. اۉز ارا آپه-اوکه بۉلگن و برچهسی حیاتدن کۉز یومگن.
منبعلرگه کۉره، بالهلردن ایکّی کیشیسینینگ جسدی سوودن چیقریب آلینگن، قالگن ایکّی جسد اېسه هنوز بېدرَک یۉقالگن.
«تری» منطقهسی کامی تومنیده کنر دریاسی بۉییده جایلشگن بۉلیب، تعطیل کونلری عایلهلر دَم آلیش اوچون بو یېرگه بارهدیلر.
منبعلرنینگ تأکیدلشیچه، آلدین هم اوشبو منطقهده شونگه اۉخشش اۉلیم بیلن یکونلنگن حادثهلر صادر بۉلگن.
احتیاطسیزلیک، دَم آلیش مسکنلری و دریا بۉیلریده خوفسیزلیک واسطهلرینینگ یۉقلیگی سووگه چۉکیشنینگ اساسي عامللری صفتیده کۉرسهتیلماقده.
