بیرلشگن ملتلر تشکیلاتینینگ سیاست و تینچلیک بۉییچه اۉرینباسری رزماری دیکارلو، کابل سفریده طالبان تشقی ایشلر وزیری امیرخان متقی بیلن اوچرهشدی.
طالبلر تشقی ایشلر وزیرلیگی بوگون (شنبه،۴ دلو) بو حقیده بیر بیانات نشر قیلیب، ایکّی تامان دوحه جریانی، هماهنگلیک و اوچرهشوولرنی بحث قیلگن.
بیاناتگه کۉره، امیرخان متقی طالبان نینگ سیاسي، خوفسیزلیک و مهاجرلرنی باشقریش بۉییچه فعالیتلری حقیده گزارش بېرگن و افغانستان داراییسینی آزاد قیلیش و بانک چېکلاولرینی آلیب تشلشنی سۉرهگن. او بو چاره-تدبیرلر انسانپرورلیک یاردملری و خصوصي سکتورنی رواجلنتیریش اوچون ضرورلیگینی تأکیدلهگن.
بیاناتده شونینگدېک ایتیلیشیچه، رزماری دیکارلو افغانستاندهگی ایجابي جریانلر، میلیونلب قَیتگن مهاجرلرنی باشقریش و انسانپرورلیک یاردملریدهگی شفّافلیکنی مقتهگن، شونینگدېک طالباننینگ مخدر مادّهلر بیلن کورهش، مخدر مادهگه بېریلگنلرنی دوالش و باشقه ساحهلردهگی ایجابي ایشلرینی مهم دېب بیلگن.
دیکارلو دوحه جریانی بۉییچه ایکّی ایشچی گروه مخدرمادهگه قرشی کورهش و خصوصي سکتور بیلن همکارلیکنی قید اېتگن و اوشبو گروهلرنینگ ییغیلیشلرینی فایدهلی دېب حسابلهگن. او باشقه مسألهلرده هم همکارلیک امکانیتلری یوزهگه کېلیشیگه امید بیلدیرگن.
شونینگدېک، بیرلشگن ملتلر تشکیلاتی اۉرینباسری انسانپرورلیک یاردملرینی یېتکزیشده همکارلیک قیلیشنی طلب قیلگن و بو یاردملرنی افغانستان اهالیسی اوچون ضرور دېب بیلگن.
حاضرگچه بیرلشگن ملتلر تشکیلاتینینگ افغانستاندهگی نمایندهلیگی (یوناما) رزماری دیکارلو سفری حقیده رسمي ایضاح بېرمهگن.
دیکارلو دوحه جریانینینگ آخرگی ییغیلیشینی باشقرگن، بو ییغیلیش طالبان نمایندهلری اشتراکیده، لېکن عیاللر و مدنی فعالیتیده اشتراک اېتگن نمایندهلر قتنهشمهگن. کۉپلب تنقیدلردن سۉنگ، او عیاللر و فعال مدنیلر بیلن علیحده اوچرهشوو اۉتکزگن، اما بعضی عیاللر و مدنی فعاللر اوشبو اوچرهشوونی بایکوت قیلگن.
حاضرچه بیرلشگن ملتلر تشکیلاتی اۉرینباسرینینگ افغانستانگه سفری رسمی آجنداسی اعلان قیلینمهگن.
