بیرلشگن ملتلر تشکیلاتینینگ تعلیم و مدنیت بۉییچه تشکیلاتی (یونیسکو) همده بیرلشگن ملتلر تشکیلاتینینگ بالهلر جمغرمهسی (یونیسف) افغانستانده۲.۲میلیون اۉسمیر قیز اۉرته مکتبلرگه باریش حقوقیدن محروم اېتیلگنینی بیلدیردی.
اوشبو ایکّی تشکیلات بوگون (شنبه، ۴ دلو) «خلقارا تعلیم کونی» مناسبتی بیلن اعلان قیلگن قۉشمه بیاناتیده افغانستان دنیاده عیاللر و قیزلر اوچون اۉرته و عالي تعلیمگه اېریشیش تۉلیق تعقیقلنگن یگانه مملکت اېکنینی تأکیدلهگن.
یونېسکو و یونیسف، شونینگدېک، افغانستان تعلیم بحرانی بیلن یوزمه-یوز کېلگنینی بیلدیریب، بالهلرنینگ۹۳ فایزی باشلنغیچ تعلیمنی توگتگچ هم اۉقیشنینگ اساسي کۉنیکمهلریگه اېگه اېمسلیگینی قید اېتگن.
اوشبو ایکّی تشکیلات بیاناتیگه کۉره،۲۰۲۵ ییلده اۉتکزیلگن بیر تدقیقات شونی کۉرسهتهدیکی، عالي معلوماتگه اېگه اۉقیتووچیلر فعالیت یوریتهیاتگن مکتبلرده اۉقووچیلر، اینیقسه تیل اۉرگنیشده، انچه یخشی نتیجهلرگه اېریشماقده.
تشکیلاتلرنینگ قۉشیمچه قیلیشیچه، تدقیقات نتیجهلری عیال اۉقیتووچیلر کوچلیراق مضمون بیلیمیگه اېگه اېکنینی و بو حالت اۉقووچیلرنینگ یخشیراق اۉرگنیش نتیجهلری بیلن بېواسطه باغلیقلیگینی کۉرسهتهدی. بو اېسه تعلیم تیزیمیده ملَکهلی عیاللر سانینی آشیریش مهملیگینی ینه بیر بار تصدیقلهیدی.
یونسکونینگ افغانستاندهگی نمایندهلیگی مسوولی سوهیون کیم شوندهی دېدی: قیزلر تعلیم آلیش امکانیدن محروم بۉلسه، بونینگ بدلینی بوتون بیر ملت تۉلهیدی. اساسي بیلیملرنی مستحکملش و عیال اۉقیتووچیلرنی قۉللب-قوّتلش افغانستاننینگ یخشیلنیشی و برقرارلیگی اوچون مهم سرمایهدیر.
یونیسفنینگ افغانستاندهگی مسوولی تاجالدین اویواله افغانستانگه عیال اۉقیتووچیلر، نرسلر، جماعت ساغلیقنی سقلش خادملری و عیال داکترلر جوده ضرور دېدی.
اونینگ قۉشیمچه قیلیشیچه، عیاللر فقط عیاللر تامانیدن دوالنیشی ممکن بۉلگن شرایطده، اگر بوگون اولر تعلیمدن محروم بۉلسه، اېرتهگه کسل قیزلر و عیاللرگه کیم طبی خدمتلر کۉرستهدی؟»
یونیسکو و یونیسف افغانستانده تعلیمنی تیکلش اوچون ایجابی یاندشوونی قۉللب-قوّتلشینی بیلدیرگن. بو یاندشوو مکتبلرنی قَیته قوریش، اۉقیتووچیلر صلاحیتینی آشیریش، اساسي بیلیملرنی کېنگهیتیریش همده یاشلر، اینیقسه رسمي تعلیمدن چېتده قالگن قیزلر و عیاللر اوچون کۉنیکمهلرنی رواجلنتیریشنی اۉز ایچیگه آلهدی. اولر خلق ارا تعلیم کونی مناسبتی بیلن تېزلیک بیلن و جماعهوي حرکتلر، شونینگدېک، تعلیمگه سرمایه کیریتیشگه چقیریب، برچهنینگ خوفسیز، تۉلیق تعلیم آلیش حقوقینی تأمینلش ضرورلیگینی تأکیدلهگن.
