طالبلرنینگ فواید عامه وزیرلیگی سالنگ داوانیده یوز بېرگن قار کۉچکیسی عاقبتیده بیر رستورانت و بیر نېچته دکان قار آستیده قالگنینی، ایکّی کیشی هلاک بۉلیب، ینه۱۲ کیشی یرهلنگنینی معلوم قیلدی.
طالبلر فوایدعامه وزیرلیگی مطبوعات سۉزلاوچیسی محمد اشرف حق شناس بوگون (جمعه،۳ دلو) بیلدیرگن بیاناتیده اوشبو حادثه کېچه سالنگنینگ «دوشاخ» منطقهسیده صادر بۉلگنینی ایتگن.
اونینگ قۉشیمچه قیلیشیچه، هلاک بۉلگنلردن بیری نینگ جسدی دستلب بېدرَک یۉقالگن، بیراق بوگون قیدیروو-قوتقروو گروهلری تامانیدن قار آستیدن تاپیب چیقریلگن.
وزیرلیک مطبوعات سۉزلاوچیسینینگ ایتیشیچه، جراحتلنگنلردن آلتی نفری آغیر تن جراحتی آلگن، ینه آلتی کیشینینگ یرهلری یېنگیل حسابلنهدی.
او، شونینگدېک، قوتقروو گروهلری حادثه جاییده اېکنینی و قار آستیده قالیب کېتگنلرنی قوتقریش ایشلری آلیب باریلهیاتگنینی بیلدیرگن.
سۉنگگی ایکّی کون ایچیده مملکتنینگ باشقه بیر قطار ولایتلریده هم کوچلی قار و یامغیر یاغیشی انساني تلفاتلرگه سبب بۉلگن.
طالباننینگ فوق العاده حادثهلرگه قرشی کورهش ادارهسی کېچه قار یاغیشی عاقبتیده مملکتنینگ آلتی ولایتیده۱۱ کیشی هلاک بۉلگنینی معلوم قیلگن.
