چین تشقی ایشلر وزیرلیگی کابل شهریده جایلشگن چینلیکلرگه تېگیشلی رستورانتگه قیلینگن هجومنی قارهلهدی و طالباننی اوشبو هجومنی عملگه آشیرگن شخصلرنی امکان قدَر تېزراق انیقلب، جزالشگه چقیردی.
چین تشقی ایشلر وزیرلیگی مطبوعات سۉزلاوچیسی گوجیاکون بوگون (سهشنبه،۳۰ جدی) اۉتکزیلگن مطبوعات انجمنیده اوشبو هجوم عاقبتیده بیر نفر چین وطنداشی هلاک بۉلگنی و ینه بېش کیشی جراحت آلگنینی تصدیقلهدی.
اونینگ قۉشیمچه قیلیشیچه، چین طالباندن یرهلنگنلرنی دوالش و قوتقریش اوچون ضرور چارهلرنی کۉریشنی، شونینگدېک، چین وطنداشلری، لایحهلری و مؤسسهلرینینگ خوفسیزلیگینی تأمینلش بۉییچه قۉشیمچه چارهلر کۉریشنی طلب قیلگن.
چین تشقی ایشلر وزیرلیگی، شونینگدېک، مملکت یشاوچیلرینی حاضرگی خوفسیزلیک وضعیتینی انابتگه آلیب، حاضرچه افغانستانگه سفر قیلمسلیککه چقیردی.
بوندن تشقری، افغانستانده بۉلیب تورگن چین وطنداشلری و کمپنیلریدن احتیاطکارلیک و خوفسیزلیک چارهلرینی کوچهیتیریش، امکان قدَر تېزراق خوفلی منطقهلرنی ترک اېتیش سۉرهلگن.
چین تشقی ایشلر وزیرلیگی سۉزلاوچیسی، چین «هر قندهی تروریزمنی قطعي قارهلهیدی و اونگه کېسکین قرشی چیقهدی همده افغانستان و منطقه دولتلرینی تروریستیک و زۉرآورلیک فعالیتی نینگ برچه شکللریگه قرشی بیرگهلیکدهگی کورهشده قۉللب-قوّتلهیدی»
تیناوون، ساعت تخمیناً۳:۰۰ ده، بیر اۉزینی اۉزی پارتلهتگن هجومچی کابل شهرینینگ شهر نو منطقهسیده گی «گُل فروشلیک» کۉچهسیده جایلشگن « چاینیز نودل» رستورانتیده اۉزی بیلن آلیب یورگن پارتلاوچی مادّهلرنی پارتلهتگن.
طالباننینگ کابل شهریدهگی خوفسیزلیک ادارهسی معلوماتیگه کۉره، اوشبو پارتلش عاقبتیده آلتی نفر افغانستان یشاوچیسی و بیر نفر چینلیک مسلمان هلاک بۉلگن.
کابلدهگی ایمرجنسی شفاخانهسی اېسه مذکور پارتلشده ینه۱۳ کیشی، جملهدن تۉرت عیال و بیر باله جراحت آلگنینی بیلدیرگن. مذکور پارتلش اوچون مسوولیت داعش گروهی اۉز ذمّهسیگه آلگن.
