بیرلشگن ملتلر تشکیلاتی متخصصلری دولتلردن «انسانیتگه قرشی جنایتلرنینگ آلدینی آلیش و جزالش بۉییچه ینگی شرطنامه»ده جنسیتی آپارتایدنی رسماً تن آلیشنی و افغانستان عیاللرینینگ یشب کېلهیاتگن واقعیت حالتیگه حقوقي نام بېریش آرقهلی اولر بیلن همجهتلیک کۉرسهتیشنی سۉرهدی.
بیرلشگن ملتلر تشکیلاتی متخصصلرینینگ تیناوون (دوشنبه،۲۹ جدی) اعلان قیلینگن بیاناتیده «بیز اعضا دولتلرنی افغانستان عیاللری، الجیبیتی جمعیتی فعاللری و باشقه فعاللرنینگ طلبلریگه قولاق سالیشگه همده اوشبو ینگی شرطنامهگه جنسیتی آپارتاید جنایتینی کیریتیشگه چقیرهمیز».
اولرنینگ قۉشیمچه قیلیشیچه، دولتلر جنسیتی آپارتایدنی انسانیتگه قرشی جنایت صفتیده بېلگیلشنی قۉللب-قوّتلشی و شرطنامه بۉیلب جنسیتگه سېزگیر قاعدهلرنی جاري اېتیشی لازم.
بیرلشگن ملتلر تشکیلاتی متخصصلری، شونینگدېک، افغانستاندهگی عیاللر و جنسیتی عدالت فعاللرینینگ اوشبو شرطنامه بۉییچه دولتلر اۉرتهسیده یقینلشیب کېلهیاتگن مذاکرهلرده اشتراک اېتیشینی طلب قیلگن.
اولر«انسانیتگه قرشی جنایتلرنینگ آلدینی آلیش و جزالش بۉییچه شرطنامه عدالتنی تأمینلاوچی، اۉزگریش یساووچی واسطهگه ایلنیشی اوچون او بۉشلیقده ایشلب چیقیلمسلیگی کېرهک. اونینگ لېگیتیملیگی، اوشبو جنایتلر آستیده یشهیاتگن شخصلرنینگ مضمونلی اشتراکینی تأمینلهی آلیش-آلمهسلیگیگه باغلیق» دېگن.
بیرلشگن ملتلر تشکیلاتی متخصصلرینینگ قۉشیمچه قیلیشیچه: «شو سببلی، دولتلر افغانستان عیاللری و قیزلری همده جنسي بېلگیسی طفیلی نشانگه آلینگن باشقه شخصلر بیلن همجهتلیک کۉرسهتیشی، اولرنینگ حقیقي اشتراکینی کفالتلش و افغانستاندهگی یشب کېلینهیاتگن واقعی حالتلرگه جدّي اعتبار قرهتیش آرقهلی حرکت قیلیشی لازم»
تشکیلات متخصصلریگه کۉره، افغانستان عیاللرینینگ مدنی جمعیتیدهگی آوازی شونچهکه گواهلیک اېمس؛ اولر باشدن کېچیرهیاتگن ظلم بۉییچه اساسي منبعلر و یېتکچی متخصصلردیر.
متخصصلر اولرنینگ اشتراکی بوگون صادر بۉلهیاتگن جنایتلر حقیقتیگه جواب بېره آلهدیگن خلقارا حقوقنی رواجلنتیریش اوچون مهم اېکنینی تأکیدلهگن.
طالبان افغانستان اوستیدن ینه نظارتنی قۉلگه آلگنیدن بېری، عیاللر و قیزلرنی تعلیم و ایش حقوقیدن محروم اېتیب، اولرنینگ جمعیتدهگی اشتراکیگه کېنگ قمراولی چېکلاولر جاري قیلگن.
افغانستان عیاللری طالبلر سیاستینی «جنسیتی آپارتاید» دېب حسابلب، اونی خلق ارا قانونلرده جنایت صفتیده بېلگیلش و دنیا دولتلری تامانیدن تن آلینیشی طلبینی ایلگری سۉرماقده.
