طالبان سۉزلاوچیسینینگ اۉرینباسری حمدالله فطرتنینگ ایتیشیچه، حاضرگچه ایران و پاکستاندن مجبورن چیقریلگن مهاجرلرگه مملکتنینگ تورلی ولایتلریده اوچ مینگ ۴۶ نمره یېر ترقهتیلگن.
فطرت بوگون (جمعه، ۲۶جدی) ایکس اجتماعی ترماغیده نشر قیلگن پُستیده، مجبورن چیقریب یوباریلگن مهاجرلرگه یېر تقسیملش جریانی طالبان رهبری هبتالله آخوندزادهنینگ بویروغیگه اساسن «جدللشتیریلگنینی» بیلدیرگن.
اونینگ قۉشیمچه قیلیشیچه، «مهاجرلر معمالرینی کۉریب چیقیش کمیسیونی» اوشبو مهاجرلرگه ینه قۉشیمچه یېرلرنی تقسیملش اوستیده ایش آلیب بارماقده.
طالبان سۉزلاوچیسینینگ اۉرینباسری، شونینگدېک، قَیتیب کېلگنلرگه کۉرسهتیلهیاتگن یاردملر جملهدن، آزیق-طعام و نقد پول یاردمینی بېریش جریانی هم تېزلشتیریلگنینی ایتگن.
طالبان رهبری هبتالله آخوندزاده جاري قویاش آیینینگ باشیده «مهاجرلر معمالرینی کۉریب چیقیش کمیسیونی» مسووللریگه مجبورن دېپورت قیلینگن مهاجرلر اوچون شهرچهلر برپا اېتیش و یېر تقسیملش جریانینی جدللشتیریش بۉییچه کۉرستمه بېرگن اېدی.
شونینگدېک، او مذکور کمیسیونگه اېکینچیلیک وزیرلیگی ذخیرهلریدن بو مهاجرلر اوچون بوغدای و نقد پول ترقهتیشنی هم بویورگن.
جاري قویاش ییل دوامیده ایران و پاکستان افغانستانلیک مهاجرلرنی دېپورت قیلیش جریانینی کوچهیتیریب،۲.۵میلیوندن آرتیق مهاجرنی افغانستانگه چیقریب یوباردی.
طالبان بو دور مابینیده بیر نېچه بار قَیتیب کېلگنلر اوچون یېر توزیع قیلینهیاتگنی و شهرچهلر قوریلهیاتگنی حقیده ادعا قیلگن، بیراق عملده بو بارهده سېزیلرلی ایشلر عملگه آشیریلمهگن.
بعضی قَیتیب کېلگنلر اېسه طالبان اَیریم شهرچهلرده اولرگه اوی قوریشگه هم رخصت بېرمهیاتگنی، مهاجرلر اوچون اجرهتیلگن مخصوص شهرچهلرده قوریلیش ایشلرینی تۉختهتیب قۉیگنینی اَیتماقده.
