بیرلشگن ملتلر تشکیلاتی جمعیت صندیغینینگ ایتیشیچه، جاپان حکومتی افغانستاننینگ اوزاق منطقهلریده طبيعي آفتلردن ضرر کۉرگن شخصلرگه طبي خدمت و روحي-اجتماعي حمایتنی تأمینلش اوچون اوچ میلیون دالر یاردم بېرگن.
اوشبو تشکیلات بوگون (پنجشنبه،۲۵جدی) اعلان قیلگن بیاناتیده ایتیشیچه، مبلغ «اوزاق حدودلردهگی کم تأمینلنگن و آفتدن ضرر کۉرگن اهالی همده، آنه، چقهلاق، باله و اۉسمیر سلامتلیگی خدمتلرینی کوچهیتیریش همده طعاملنیش و روحي-اجتماعي قۉللب-قوّتلش خدمتلری» لایحهسیگه یۉنهلتیریلهدی.
بیرلشگن ملتلر تشکیلاتی جمعیت صندیغینینگ ایتیشیچه، لایحه۶۰ ته ساغلیق مسکنی آرقهلی دایکندی، فاریاب، خوست، کنر و پکتیکا ولایتلریده عملگه آشیریلهدی.
اوشبو لایحه آرقهلی۲۱۰مینگ کیشی، جملهدن عیاللر، اۉسمیر قیزلر، حاملهدار و اېمیزیکلی عیاللر همده بېش یاشگچه بۉلگن بالهلر بېش ولایتده قمرهب آلینهدی.
بیرلشگن ملتلر تشکیلاتینینگ جمعیت جمغرمهسی معلوماتیگه کۉره، اوشبو قمراوگه ایچکی کۉچیریلگنلر، ایران و پاکستاندن قَیتگنلر همده اوزاق حدودلردهگی کم تأمینلنگن مېزبان جماعهلر یاکه طبيعي آفتلردن ضرر کۉرگنلر کیرهدی.
شونینگدېک، اوشبو مبلغ آرقهلی۸۴۰ معلول شخصگه هم طبي خدمتلر کۉرسهتیلهدی، شونده ساغلیقنی سقلش خدمتلریگه تېنگ کیریش تأمینلنهدی.
تشکیلات نمایندهسی کوابنا آسانته-انتیامواه نینگ ایتیشیچه، جاپان تامانیدن بېریلگن ینگی یاردم بو تشکیلاتگه افغانستان نینگ اېنگ چېکّه جماعهلریگه اۉز خدمتلرینی سېزیلرلی درجهده کېنگهیتیریش امکانینی بېرهدی.
