بیرلشگن ملتلر تشکیلاتینینگ بالهلرنی قۉللب-قوّتلش صندیغی( یونیسف) جاري ییلده افغانستانده۱۲ میلیون کیشینی، جملهدن۶.۵ میلیون بالهنی قۉللش اوچون ۹۴۹.۱ میلیون دالر مبلغ ضرورلیگینی معلوم قیلدی.
مذکور تشکیلات بوگون (سهشنبه۲۳ جدی) اعلان قیلگن بیاناتیده، اوشبو مبلغ عوضیگه محتاج اهالیگه حیاتنی سقلب قالووچی یاردملر و اساسي خدمتلر کۉرسهتیلیشینی بیلدیردی.
یونیسفنینگ تأکیدلشیچه، بو مبلغ آرقهلی بیر تاماندن زودلیک بیلن بشری احتیاجلرگه جواب بېریلهدی، ایکّینچی تاماندن اېسه جمعیتلر نینگ اوزاق مدتلی برقرارلیگی مستحکملنهدی. بو اېسه افغانستاندهگی هر بیر باله نینگ امان قالیشی و رونق تاپیشی اوچون امکان یرهتهدی.
بیرلشگن ملتلر تشکیلاتینینگ بالهلرنی قۉللش جمغرمهسی افغانستان اهالیسی هنوز بیر-بیری بیلن باغلیق بیر قطار بحرانلرگه دوچ کېلهیاتگنینی قید اېتگن. طبيعي آفتلردن تارتیب، حمایه و قۉللب-قوّتلش امکانیتلری نینگ چېکلنیشی، ضعیف اقتصادیات، اساسي خدمتلرگه اېریشیش امکانی نینگ کملیگی همده اقلیم اۉزگریشی عاقبتیدهگی ضربهلر، بولرنینگ برچهسی قریب تۉرت اۉن ییللیک اوروشدن کېینگی تیکلنیش و قَیته قوریشگه تۉسقینلیک قیلماقده.
تشکیلات شونینگدېک، حمایه بحرانی تاباره کوچهییب بارهیاتگنینی، توغیش یاشیدهگی عیاللر، بالهلر، یاشلر و جمعیتدن چېتلهتیلگن گروهلر تاباره آرتیب بارهیاتگن خوفلرگه دوچ کېلهیاتگنینی قۉشیمچه قیلگن. یونیسف بیاناتیده ینه شوندهی دېییلهدی: «افغانستاندهگی عیاللر و قیزلر حقوقي جهتدن تیزیملی بحرانگه دوچ کېلماقده. اۉرته تعلیمدن چېتلهتیلیش و محنت بازاریده اشتراک اېتیش تعقیقلری، کوندهلیک حیاتدهگی کېسکین چېکلاولر بیلن بیرگه، حمایه خوفلرینی کوچهیتیریب، جمعیت نینگ اوزاق مدتلی برقرارلیگینی تهدید آستیگه قۉیماقده. بو حالت نینگ عاقبتلری اولادلر دوامیده سېزیلهدی»
