جهان ساغلیقنی سقلش تشکیلاتینینگ معلوم قیلیشیچه، جاپان حکومتی افغانستانده ساغلیقنی سقلش خدمتلرینی تقدیم اېتیش اوچون اوشبو تشکیلاتگه۲۴۰ مینگ دالر مقداریده یاردم کۉرستگن.
تشکیلات بوگون (دوشنبه، ۲۲جدی) اعلان قیلگن بیاناتیده جاپان حکومتینینگ اوشبو یاردمینی ایلیق کوتیب آلگنینی بیلدیرگن.
جهان ساغلیقنی سقلش تشکیلاتینینگ تأکیدلشیچه، اوشبو مبلغ تشکیلاتگه ضرور ساغلیقنی سقلش خدمتلرینی کوچهیتیریش و دالضرب احتیاجلرنی قاندیریش امکانینی بېرهدی.
شونینگدېک، مبلغ یاردمیده اېنگ ضعیف قتلمدهگی آدملر، جملهدن عیاللر، بالهلر و سرگردان عایلهلر اوچون دایمي و حیاتنی سقلاوچی یاردملر تقدیم اېتیلهدی.
تشکیلات اۉز فعالیتینی اساسن گیاهوند مادّهلرنی سوءاستعمال قیلیش بۉییچه دوالش مرکزلرینی سقلش و اېنگ ضرور طبي واسطهلر موجود بۉلگن حدودلرده فوق العاده طبي یاردمنی تأمینلشگه قرهتیشینی بیلدیرگن.
اوشبو تشکیلات نینگ افغانستاندهگی نمایندهسی ادوین سنیزا سالوادور: «بیز اوشبو مرکّب دورده افغانستان خلقینینگ یانیده تورگن جاپان خلقیگه و حکومتیگه منّتدارمیز»
اونینگ قۉشیمچه قیلیشیچه: «اولرنینگ یاردمی، گیاهوند مادّهلرنی سوءاستعمال قیلووچی بېمارلر و فوق العاده طبي خدمتلرنی اۉز ایچیگه آلگن ضرور ساغلیقنی سقلش خدمتلرینی دوام اېتتیریشگه یاردم بېرهدی.»
جاپان اېلچیسی کنیچی ماساموتو افغانستانده صادر بۉلهیاتگن معمالردن چوقور خواطرده اېکنینی و تشکیلاتنینگ ضرور ساغلیقنی سقلش خدمتلرینی کوچهیتیریشدهگی یاردمینی قدرلشینی بیلدیرگن.
جاپان گیاهوند مادّهلرنی سوءاستعمال قیلیش بۉییچه دوالش و فوق العاده یاردم کبی ساحهلرگه اوستوار اعتبار بېریش آرقهلی افغانستان خلقینینگ ساغلیگی، چیدملیلیگی و فراوانلیگی اوچون اۉز مجبوريتینی قَیته تصدیقلهیدی دېب قۉشیمچه قیلدی.
طالبان افغانستانده حاکمیتنی قَیته اېگهلهگنیدن کېین جاپان اوشبو مملکتگه اېنگ کتّه یاردم کۉرسهتهدیگن دولتلردن بیری بۉلیب قالگن.
جاپان حکومتینینگ یاردملری اساسن تعلیم، ساغلیقنی سقلش و قیشلاق خۉجهلیگی ساحهلریگه یۉنهلتیریلگن و بیرلشگن ملتلر تشکیلاتی نینگ تېگیشلی نهادلری آرقهلی تقسیملنهدی.
