طالبلر رهبری هبتالله آخوندزاده اوشبو گروه باشقروویدهگی ایکّی وزیرنی اۉرین المشتیردی و برشنا شرکتی باشلیغینی تشقی ایشلر وزیرلیگینینگ تشریفات باشلیغی اېتیب تعیینلهدی.
اوشبو اۉزگریشلرگه کۉره، عبداللطیف منصور ینگی لوازمده قیشلاقلرنی قَیته تیکلش و رواجلنتیریش وزیری اېتیب تعیینلندی، اونینگ اۉرنیگه اېسه محمدیونوس آخوندزاده سوو و برق وزیری لوازمیگه تعیینلندی.
ینگی تعیینلاولرده طالبان رهبری گروه نینگ فواید عامه وزیرلیگیدهگی مالی و اداری مسألهلر بۉییچه معاونی بۉلگن ملا عبدالحق همکارنی برشنا شرکتینینگ باش باشلیغی اېتیب تعیینلهدی.
اونینگ اۉرنیگه اېسه اخبارات و مدنیت وزیرلیگی نینگ یاشلر ایشلری بۉییچه سابق معاونی محمدیونوس راشید فواید عامه وزیرلیگینینگ مالی و اداری اۉرین باسری اېتیب تعیینلندی.
هبتالله آخوندزاده برشنا شرکتی نینگ سابق باشلیغی عبدالباری عمرنی تشقی ایشلر وزیرلیگی نینگ تشریفات باشلیغی اېتیب تعیینلهدی.
سۉنگگی تۉرت ییل ایچیده بو برق شرکتی باشلیغی بیر نېچه بار اۉزگرگن. عبدالباری عمر دستلب طالباننینگ ساغلیقنی سقلش وزیرلیگیگه اۉرین باسر اېتیب تعیینلنگن، کېین برشناگه اۉتکزیلگن و حاضر اېسه تشقی ایشلر وزیرلیگیگه یوباریلگن.
بوندهی لوازم المشوولری طالبان باشقروویده عادتي حالگه ایلنگن. گروه رهبری وقتی-وقتی بیلن منصبدارلرنی اۉرین المشتیریب تورهدی.
سۉنگگی تۉرت ییل دوامیده فقطگینه مدافعه وزیری، ایچکی ایشلر وزیری، استخبارات باشلیغی و طالبان نینگ ایکّی نفر باش وزیر اۉرینباسری لوازمیده اۉزگریش بۉلمهگن.
