جوزجان ولایتیدهگی منبعلر عبدالرشید دۉستم گه یقین بۉلگن، ایلگری خلق کوچلری قوماندانی صفتیده خدمت قیلگن و یقینده ایراندن قَیتگنیدن سۉنگ قوراللنگن شخصلر هجومی عاقبتیده آتیب اۉلدیریلگنینی تصدیقلهدی.
منبعلرگه کۉره، اوشبو محلي قوماندان «محمدیوسف قوماندان» نامی بیلن تنیلگن بۉلیب، تیناوون (چهارشنبه، ۱۷ جدی) تخمیناً کېچه ساعت ۱۰:۰۰ اطرافیده خوجه دوکوه اولسواللیگی مرکزیده تۉی مراسمیدن چیقهیاتگن پیتده هجومگه اوچرهگن.
اوشبو قاتللیک نینگ سببی حاضرچه انیق اېمس، بیراق اَیریم منبعلر هجومده طالبان اعضالری اشتراک اېتگنینی اَیتماقده.
منبعلرنینگ تأکیدلشیچه، «محمدیوسف قوماندان» یقینده ایراندن مجبورن دېپورت قیلینگن اېدی.
شونینگدېک، او جوزجانگه قَیتگنیدن کېین طالبان تامانیدن حبسگه آلینیب، سۉراق قیلینگن.
طالباننینگ جوزجان ولایتیدهگی محلي رسميلری مذکور قاتللیک یوزهسیدن حاضرچه هېچ قندهی معلومات بېرمهگن.
طالبان رهبری تامانیدن اعلان قیلینگن عمومي عفو وعدهسیگه قرهمهی، سابق حربي خدمتچیلرنی حبسگه آلیش و اۉلدیریش حالتلری هنوز دوام اېتماقده. طالبان سابق حربيلرگه قرشی اۉچ نی عملگه آشیرهیاتگنلیکده عیبلنماقده.
