محلی منبعلریگه کۉره، هرات- اسلام قلعه عمومی یۉلیده ایکّی علیحده ترافیک حادثهسی یوز بېرگن بۉلیب، کمیده بېش کیشی جان بېرگن و اوچ کیشی جراحت آلگن.
منبعلرنینگ ایتیشیچه، بیرینچی حادثه بوگون (سهشنبه، ۱۷ جدی) تخمیناً ساعت۱۲:۰۰ اطرافیده، بیر «سراچه» روسوملی موتر بیلن بیر تېلر موتری تۉقنهشگنده یوز بېرگن.
منبعلرنینگ قۉشیمچه قیلیشیچه، اوشبو حادثهده اوچ کیشی، جملهدن بیر عیال، اۉلگن و ایکّی کیشی قتّیق یرهلنگن. معلوماتلرگه کۉره، اۉلگنلر و یرهلنگنلر «سراچه» موتری یۉلاوچیلری بۉلگن.
منبعلرنینگ خبر بېریشیچه، ایکّینچی حادثه هم بوگون توشدن کېین اوشبو عمومی یۉلده یوز بېرگن بۉلیب، اونده ایکّی کیشی اۉلگن و بیر کیشی یرهلنگن. قربانلر خلقارا قوتقروو کمیتهسی خادملری اېکنلیگی بیلدیریلدی.
منبعلرگه کۉره، ایکّی حادثهده یرهلنگنلر دوالنیش اوچون هرات ولایت مرکزي شفاخانهسیگه آلیب کېتیلگن.
حاضرگه قدَر هراتدهگی محلي طالبلر مسووللری بو حادثهلر بۉییچه ایضاح بېرمهگن.
هرات-اسلام قلعه عمومی یۉلی مملکتدهگی تیربند یۉللردن بیری بۉلیب، اما یۉل نینگ بوزیلیشی و هیداوچیلرنینگ احتیاطسیزلیگی وقتی-وقتی بیلن اۉلیملی حادثهلرگه سبب بۉلهدی.
