طالباننینگ کانلر و نفت وزیرلیگینینگ معلوم قیلیشیچه، محلي اهالی بیلن شرطنامهچی بیر شرکت اۉرتهسیده آلتین کانی اوستیده یوزهگه کېلگن تۉقنهشوونی اۉرگنیش اوچون تخار ولایتینینگ چاآب اولسوالیگیگه مخصوص هیئت یوباریلگن.
طالبان کانلر و نفت وزیرلیگی مطبوعات سۉزلاوچیسی همایون افغان بوگون (سهشنبه،۱۶ جدی) اوشبو هیئت تخاردهگی طالبان واليسی رهبرلیگیده جۉنهتیلگنینی معلوم قیلدی.
اونینگ قۉشیمچه قیلیشیچه، تۉقنهشوو مالی ضرر و قربانلرگه آلیب کېلگن، بیراق بو بارهده انیق تفصیلاتلر بېریلمهگن.
سۉنگگی بیر نېچه کوندن بویان تخارنینگ چاآب اولسواللیگی اهالیسی آلتین کانلرینینگ حددن تشقری قزیب آلینیشی و بو جریان نینگ منطقه نینگ سوو منبعلریگه ضرر یېتکزهیاتگنیگه ناراضیلیک بیلدیرماقده.
منبعلرگه کۉره، طالبان تامانیدن ناراضیلیک نمایشلری باستیریلیشی چاغیده اوچ کیشی هلاک بۉلگن، ینه آلتی کیشی یرهلنگن.
شونینگدېک، منبعلر ایتیشیچه، نمایشچیلر هم شرطنامهچی کمپنی ملکیگه اۉت قۉییشگن.
طالبان افغانستان اوستیدن قَیته نظارتنی قۉلگه کیریتگنیدن بویان مملکت کانلرینی کېنگ مقیاسده قزیب آلیش و اولرنینگ محصولاتلرینی ساتیشگه کیریشگن.
بیراق، طالبان تامانیدن کانلرنینگ قزیب آلینیشی کېنگ کۉلملی تنقید و ناراضیلیکلرگه سبب بۉلیب کېلماقده و بو گروه مملکت بایلیکلرینی تالان-تاراج قیلیشده عیبلنماقده.
