ایران انرژی وزیری عباس علی آبادينینگ ایتیشیچه، ایران و تورکمنستان افغانستاندهگی هریرود دریاسیدن سوو اولوشیگه (حق-آبه) اېگه و اونی آلیش مسألهسیده مذاکرهلر آلیب باریلیشی کېرهک.
ایرنا اخبارات آژانسینینگ خبریگه کۉره، علی آبادي سهشنبه کونی ژورنالیستلرگه، «مملکتیمیز و تورکمنستان هریرود دریاسیدن حق-آبهگه اېگه، بیراق قۉشنی مملکت دریا نینگ یوقاری آقیمیده سَلما تۉغانینی قورگن. شو سببلی دۉستلیک تۉغانی (ایران و تورکمنستان نینگ قۉشمه تۉغانی) اوچون سوو اولوشینی آلیش مسألهسیده مذاکره قیلیشیمیز لازم» دېگن.
هریرود دریاسی تخمیناً ۱۱۰۰ کیلومتر اوزونلیککه اېگه بۉلیب، افغانستان مرکزي تاغلریدن، لعل و سرجنگل اولسواللیگیدن باشلنهدی. او غور و هرات ولایتلریدن اۉتیب، افغانستان-ایران عمومي چېگرهسیدن اۉتهدی، سۉنگ تورکمنستان حدودیگه کیریب، قارهقوم چۉللریده سینگیب کېتهدی.
ایران و تورکمنستان هریرود دریاسی اوستیده، ایکّی دولت چېگرهسیده، دۉستلیک تۉغانینی برپا اېتگن.
افغانستانده اېسه اوشبو دریا اوستیده سَلما تۉغانی و پاشدان تۉغانی قوریلگن.
پاشدان تۉغانی، هرات ولایتی نینگ کرخ اولسواللیگیده جایلشگن بۉلیب، جاري ییلده سوو تۉپلشگه تیار حالتگه کېلتیریلگن.
افغانستانده سوو انبارلری و سوونی باشقریش انشااتلری نینگ قوریلیشی هر دایم قۉشنی دولتلر، جملهدن ایران اوچون خواطر منبعی بۉلیب کېلگن.
حاضرگچه ایران و افغانستان فقط هلمند (هیرمند) دریاسی سوولری بۉییچه بیتیمگه اېگه.
سۉنگگی ییللرده، افغانستان آغیر قورغاقچیلیکنی باشدن کېچیرهیاتگن بیر پیتده، ایران افغانستاننی هلمند بۉییچه کېلیشوونی بوزیشده عیبلب کېلماقده.
ایران انرژی وزیری نینگ ایتیشیچه، مملکت جمهور رییسی سیاسي مسووللرگه افغانستاندن اېران نینگ حق-آبهسینی آلیش بارهسیده فعالراق بۉلیشنی بویورگن.
اونینگ قۉشیمچه قیلیشیچه، ایران طالبان بیلن کۉپلب مذاکرهلر آلیب بارگن، بیراق اۉتگن ییلی ایران نینگ برچه سوو اولوشی تأمینلنگن.
علی آبادي مذاکرهلر دوام اېتهیاتگنینی تأکیدلب، شوندهی دېگن:
«مېن افغانستان تامانیدن ایکّی بار ایرانگه تشریف بویوریشگه تکلیف قیلدیم، اوچینچی بار هم تکلیف قیلهمن. اگر کېینگی سفر بۉلمهسه، بیز اوشبو مسألهنی جدّي روشده جاییده کوزهتیش اوچون هیئت یوباریشگه تیارمیز».
