محلي منبعلرنینگ کاپیسا ولایتیده ایتیشیچه، اوشبو ولایتنینگ تگاب اولسواللیگی یشاوچیسی ناقانوني یۉل بیلن ایرانگه باریشگه اورینگن پیتده نیمرور ولایتینینگ چېگره حدودلریده ایران چېگرهچیلری تامانیدن اۉققه توتیلیب اۉلدیریلگن.
منبعلرگه کۉره، بو یاش ییگیت نینگ اسمی بصیر بۉلگن و او۱۲ کون آلدین باشقه بیر گروه یاشلر بیلن بیرگه نیمروزنینگ چېگره حدودلری آرقهلی ایرانگه اۉتماقچی بۉلگن.
منبعلر بصیرنینگ جسدی بوگون (دوشنبه، ۱۵ جدی) نیمروزدن کاپیسا نینگ تگاب اولسواللیگیگه آلیب کېلینگنی و اېرتهگه دفن اېتیلیشی رېجهلشتیریلگنینی اَیتماقده.
خبرلرگه کۉره، بصیر عالي تحصیلاتگه اېگه اوشبو یاش مملکتدهگی ایشسیزلیک سببلی ایرانگه مردکارلیک قیلیش اوچون باریشنی رېجهلشتیرگن.
منبعلر اوشبو ییگیت بیلن بیرگه بۉلگن باشقه شخصلرنینگ تقدیری حقیده معلومات بېرمهگن.
جاري قویاشي ییل دوامیده ایران چېگرهچیلری تامانیدن اۉققه توتیلیشی عاقبتیده مملکت یشاوچیلرینینگ هلاک بۉلیشی بیلن باغلیق کۉپلب حالتلر قید اېتیلگن.
شونینگدېک، تخمیناً بیر آی آلدین هم ایران چېگرهچیلری اۉق اوزیشی نتیجهسیده مملکت نینگ ۱۲ نفر یشاوچیسی هلاک بۉلگنی حقیده خبرلر ترقهلگن.
