هند تشقی ایشلر وزیرلیگی ایراندهگی عامهوي نمایشلرگه اشاره قیلیب، هندستانلیکلردن بو مملکتگه کېرهکسیز سیاحتلردن سقلنیشنی سۉرهدی.
بوگون (دوشنبه، ۱۵جدی) وزیرلیک هندستاندهگی یشاوچیلریدن ایران منطقهلریده نمایشلر بۉلهیاتگن جایلردن اوزاق توریشنی هم طلب قیلدی.
شونینگدېک، هندستان وطنداشلری ایرانده بۉلسه، ینگیلیکلر و وزیرلیکنینگ اجتماعي ترماقلردهگی صحیفهلرینی یقیندن کوزهتیب باریشلری و اۉزلرینی اېلچیخانهگه تنیشتیریشلری توصیه اېتیلدی.
حاضرگی نمایشلر ایران پایتختی تهرانده بعضی دوکان اېگهلری دالرنینگ ريالگه نسبتاً نرخینینگ آشیشیگه قرشی ناراضیلیک بیلدیریشی بیلن باشلنیب، تېز آرهده مملکت نینگ باشقه شهرلریگه هم ترقهلدی.
نمایشچیلر حاضرگی پیتده ایراننینگ کۉپلب شهرلریده حکومتگه قرشی شعارلر ایتیب، ناراضیلیکلرینی بیلدیرهیاتگنلر.
بعضی عامهوي اخبارات واسطهلری خبرنینگ بېریشیچه، نمایشلر وقتیده کمیده۱۸ نفر اشتراکچی ایران خوفسیزلیک خادملری تامانیدن اۉق اوزیلیشی نتیجهسیده هلاک بۉلگن و ینه اۉنلب کیشی حبسگه آلینگن.
شونینگدېک، خبرلر ترقهلیشی آرتیدن امریکا جمهور رییسی دونالد ترامپ ایران نمایشچیلرگه قرشی زۉروانلیکنی دوام اېتتیرسه، امریکا اولرنی قوتقریش اوچون حرکت قیلیشی حقیده آگاهلنتیردی.
نشر اېتیلگن صورتلر و ویدیولر نمایشچیلر بعضی شهرلریده حکومتگه قرشی شعارلر ایتهیاتگنینی کۉرسهتماقده.
بعضی خبرلر بۉییچه، اوشبو نمایشلر دوامیده کمیده سکّیز نفر اشتراکچی هلاک بۉلگن و اۉنلب کیشی حبسگه آلینگن.
