بیرلشگن ملتلر تشکیلاتی بالهلرنی قۉللب-قوّتلش صندیغی (یونیسف) نینگ افغانستاندهگی نمایندهلیگینینگ معلوم قیلیشیچه، جدّي آچلیک و یېترلی طعام یېتیشماوچیلیگی سببلی۸۵۷ مینگدن آرتیق بېش یاشگچه بۉلگن بالهلر دوالنیشگه محتاج بۉلیشی کوتیلماقده.
بوگون، یکشنبه، ۱۴ جدی کونی، یونیسف ایکس اجتماعی صحیفهسیده یازیشیچه، نوامبر آییده اولر۱.۲میلیون بالهنی آزغینلیک بۉییچه کۉریکدن اۉتکزگن، شولردن ۳۳مینگ۵۱۰ بالهنی دوالنیش اوچون یاتقیزیشگن. بو بالهلر نینگ۵۸ فایزی قیز بالهلر بۉلگن.
یونیسفنینگ تأکیدلهشیچه: «لېکن احتیاج حلی هم کتّه، تخمیناً۸۵۷مینگ بېش یاشگچه بۉلگن باله جدّي آزیقلنیش یېتیشماوچیلیگی سبب دوالنیشگه محتاج»
آلدینراق یونیسفنینگ معلوم قیلیشیچه، افغانستانده جدّي آزیقلنیش یېتیشماوچیلیگی بیلن آغریگن بالهلر سانی۳.۷میلیونگه یېتگن.
یونیسف۱.۳میلیون آغیر آزغینلیک و اۉرته خوفلی آزیقلنیش یېتیشماوچیلیگی بۉلگن بالهلرگه دوالش خدمتلرینی کۉرستماقچی، اما مالی منبعلر یېتیشمسلیگی طفیلی بعضی آزیقلنیش مرکزلری یقینده یاپیلگن. بیرلشگن ملتلر تشکیلاتی تامانیدن نشر اېتیلگن اېنگ سۉنگگی انتیگراسیونلشگن آزیقلنیش خوفسیزلیگی فازی(آیپیسی) حساباتیگه کۉره، کېلهیاتگن قیشده۱۷.۴میلیون کیشی آغیر آزیقلنیش خوفی آستیده قالیشی کوتیلماقده.
