بوگون (پنجشنبه، ۱۱ جدی) هرات ولایتیده۱۳۰ نفر یاش جُفتلیک اشتراکیده جماعهوي نکاح تۉیی بۉلیب اۉتدی.
اوشبو مراسم هرات شهریدهگی تۉی سالونلریدن بیریده «حبیبیار خیریه جمغرمهسی» مالیوي کمگیده تشکیل اېتیلدی.
جمغرمه مسوولی عبدالحق صدیقینینگ ایتیشیچه، هر بیر جُفتلیککه۱۰۰ مینگ افغاني مقداریده سېپ بېریلگن بۉلیب، اوشبو جماعهوي تۉی مراسمی نینگ عمومي خرجتی۱۳ میلیون افغانينی تشکیل قیلگن.
صدیقینینگ تأکیدلشیچه، هر بیر جُفتلیککه نقد یاردمدن تشقری، 72 توردهگی اوی-روزگار بویوملری و آزیق-آوقت محصولاتلری هم ترقهتیلگن، تاکه اولر عایلهوي حیاتنی خاطرجمعلیک بیلن باشلشلری ممکن بۉلسین.
اونینگ قۉشیمچه قیلیشیچه، اوشبو دستورنینگ اساسي مقصدی اقتصادي قیینچیلیکلر سببلی اۉز تۉی مراسمینی اۉتکزه آلمهگن یاشلرگه یاردم بېریش دیر.
بیر قطار یاش جُفتلیکلر هم بوندهی مراسملردن ممنون اېکنینی بیلدیریب، اقتصادي معمالر طفیلی تۉی قیلیش امکانیگه اېگه بۉلمهگنلیکلرینی ایتیشگن.
«حبیبیار خیریه جمغرمهسی» آلدین هم هراتده بیر نېچه بار جماعهوي تۉی مراسملرینی اۉتکزگن بۉلیب، بو تدبیر اونینگ اۉن بېشینچی باسقیچی حسابلنهدی.
سۉنگّی ییللرده تورلی تشکیلاتلر کمگیده اۉتکزیلهیاتگن جماعهوي تۉیلر مملکت نینگ تورلی منطقهلریده کېنگ عامهلشیب، اهالی تامانیدن ایلیق کوتیب آلینماقده.
