محلي منبعلرنینگ خبر بېریشیچه، هراتده طالبان غلام فاروق سرغوش و فیروز احمد ملائکه اوشبو ولایت نینگ تنیقلی و تجربهلی تیاتر صنعچیلرینی حبسگه آلگن.
منبعلرگه کۉره، طالباننینگ امر به معروف و نهی از منکر ادارهسی اوشبو ایکّی صنعتکارنی بوگون (پنجشنبه، ۱۱جدی) چقیریب، کېین حبسگه آلگن.
منبعلر حبسگه آلیش سببینی بو ایکّی صنعتکار طالبان نینگ ادارهسی تامانیدن چهارشنبه کونی اۉتکزیلگن جانلی تصویرلرنی نشر قیلیشنی تعقیقلش بویروقیگه تنقیدي مناسبت بیلدیرگنلر دېب قۉشیمچه قیلگن.
هراتدهگی محلي طالبان رسمیلری حاضرچه اوشبو ایکّی صنعتچی نینگ حبسگه آلینگنی بۉییچه ایضاح بېرمهگن.
طالبان تیناوون هراتده جانلی تصویرلرنی نشر قیلیش منع بۉلیشینی جاري قیلگن.
هراتدهگی امر به معروف باشلیغی ژورنالیستلر بیلن اۉتکزیلگن ییغیلیشیده جانلی تصویرلرنی نشر قیلیشنی منع بۉلیشی بو گروه نینگ رهبری هبت الله آخوندزاده تامانیدن بېریلگن بویروق بۉلیب، «اونینگ بوزیلیشی خدا نینگ بویروقلرینی بوزیش بۉلیب، قبول قیلینمهیدی.»
غلام فاروق سرخوش اوچ اۉن ییلدن آرتیق وقت دوامیده هراتده تیاتر ساحهسیده فعالیت یوریتیب کېلگن و یقینده اوشبو ولایت تیاتر صنعتکارلری اویوشمهسی رئیسی صفتیده سهیلنگن اېدی.
فیروز احمد ملائکه هم هرات تیاتر صحنهسی نینگ تنیقلی صنعتکارلریدن بیری دیر.
طالبان افغانستانده ینه حاکمیتنی قۉلگه آلگنیدن بېری صنعت فعالیتلریگه کېنگ قمراولی چېکلاولر جاري قیلگن و صنعتکارلرنی بیر نېچه بار حبسگه آلیب، قماققه تشلهگن.
اوشبو گروه شونینگدېک، امر به معروف و نهی از منکر قانونیده جانلی تصویرلرنی نشر قیلیشنی تعقیقلهگن و استه-سېکین بو قانوننی اجرا قیلماقده.
