بیرلشگن ملتلر تشکیلاتینینگ انسان پرورلیک یاردمنی موافقلشتیریش بۉییچه اداره (اوچا) افغانستانده محتاج اهالیگه یاردم کۉرسهتیش اوچون ینگی میلادي ییلده۱.۷۱ میلیارد دالر مبلغ ضرورلیگینی معلوم قیلدی.
اوچا بوگون (سهشنبه، ۹ جدی)۲۰۲۶ ییل اوچون بشر دوستانه احتیاجلر و جواب چارهلریگه عاید رېجهنی اعلان قیلدی.
اوشبو اداره معلوماتیگه کۉره،۲۰۲۶ییلده تخمیناً۲۱.۹ میلیون کیشی، یعنی اهالی نینگ قریب۴۵ فایزی بشردوستانه یاردمگه محتاج بۉلیشی کوتیلماقده. شولردن۱۷.۵میلیون نفری بېواسطه یاردم کۉرسهتیش اوچون نشانگه آلینگن.
اوچانینگ تأکیدلشیچه، آزیق-آوقت خوفسیزلیگینینگ یۉقلیگی و اۉتکیر تۉییب آوقتلنمسلیک افغانستاندهگی اېنگ آغیر و اېنگ کېنگ ترقهلگن بشری احتیاج عامللری بۉلیب قالماقده.
مذکور تشکیلاتنینگ بیلدیریشیچه، عمومي محتاجلر سانیده آزگینه کمهییش کوزهتیلهیاتگنیگه قرهمهی، افغانستان۲۰۲۶ ییلده هم دنیادهگی اېنگ ییریک بشری بحرانلردن بیری بۉلیب قالهدی.
بیرلشگن ملتلر تشکیلاتینینگ قۉشیمچه قیلیشیچه، ییللر دوام اېتگن ماجرالر، اقتصادي ضعیفلیک، اساسي خدمتلرگه یېترلی سرمایه کیریتیلمهگنی و حقوقلرنینگ تېز یېمیریلیشی اهالینینگ کتّه قِسمینی ضعیف حالتگه کېلتیرگن.
اوچا معلوماتیگه کۉره، بو سورونکهلی باسیملر حاضرده آزیق-طعام خوفسیزلیگی نینگ ینهده یامانلشووی، مهاجرلر نینگ قَیتیشی، اقلیم اۉزگریشی عاقبتیدهگی قورغاقچیلیک، تکرارلنیب تورهدیگن طبيعي آفتلر همده عیاللر و قیزلرنینگ جماعت حیاتیدن تیزیملی روشده چېتلهتیلیشی بیلن ینهده کوچهیماقده.
