ایران نینگ کابلدهگی اېلچیلیگینینگ معلوم قیلیشیچه، اوشبو مملکت تېمیریۉل باشقرمسی باشلیغی و طالباننینگ جماعت فواید عامه وزیرلیگی تېمیر یۉل بۉییچه اۉرینباسری کېلهسی قویاشي ییلده خواف-هرات تېمیر یۉلی آرقهلی ایکّی دولت اۉرتهسیده بیر یریم میلیون تُن یوک تشیش بۉییچه کېلیشووگه اېریشگن.
اېلچیلیک بوگون (دوشنبه، ۸ جدی) ایکس اجتماعی ترماغیده بیلدیرگن بیاناتیده بو کېلیشوو حقیده خبر بېرگن، اما اونینگ تفصیلاتلرینی آچیقلهمهگن.
طالباننینگ فواید عامه وزیرلیگی هم علیحده بیانات چیقریب، اېران تېمیر یۉل باشقرمهسی باشلیغی جبارعلی ذاکري اوشبو وزیرلیک نینگ تخنیکي اۉرینباسری عبدالکریم فاتح و تېمیر یۉل بۉییچه اۉرینباسری محمد اسحاق صاحبزاده بیلن اوچرهشگنینی بیلدیرگن.
مذکور وزیرلیک خواف-هرات تېمیر یۉلی آرقهلی یوک تشیش بۉییچه انیق کېلیشوونی تیلگه آلمسدن، اوچرهشووده ایران و افغانستان اۉرتهسیدهگی تاریخي، اقتصادي، تجارت، ترانزیت و اجتماعي علاقهلرنی رواجلنتیریش مسألهلری محاکمه قیلینگنینی ایتگن.
خواف-هرات تېمیر یۉلینینگ عمومي اوزونلیگی۲۲۶ کیلومتر بۉلیب، اونینگ۷۷ کیلومتری اېران حدودیده،۱۴۹ کیلومتری اېسه افغانستان حدودیده جایلشگن.
بو تېمیر یۉلنینگ اېران حدودیدهگی ایکّی قِسمی همده افغانستاندهگی اوچینچی قِسمی قوریلیشی یکونلنگن.
تۉرتینچی قِسم اېسه۴۳ و۴۷ کیلومترلی ایکّی فازدن عبارت بۉلیب، یکونده هرات صناعت باغیگه اولنهدی.
طالباننینگ ایتیشیچه، حاضرده اوشبو قِسم نینگ بیرینچی و ایکّینچی فازلری قوریلیشی دوام اېتماقده.
سۉنگّی ییللرده ایران و افغانستان اۉرتهسیده خواف-هرات تېمیر یۉلی آرقهلی یوک تشیش ایشلری عملگه آشیریب کېلینماقده.
فواید عامه وزیرلیگینینگ قۉشیمچه قیلیشیچه، ایکّی تامان، شونینگدېک، هرات-بلخ تېمیر یۉلی و افغانستان آرقهلی ایراننی چینگه اولش مسألهلرینی هم محاکمه قیلگن.
وزیرلیکنینگ بیاناتیده ایتیلیشیچه، هرات-بلخ تېمیر یۉلی کوریدوری علیحده اقتصادي و استراتژیک اهمیتگه اېگه بۉلیب، او ایران، تورکيه و اروپا دولتلرینی افغانستان آرقهلی مرکزي آسیا مملکتلری و چین بیلن باغلش امکانینی بېرهدی.
