طالبانلر نظارتی آستیدهگی ملي احصائیه و معلوماتلر ادارهسینینگ معلوم قیلیشیچه، الکترون تذکره ترقهتیش جریانی باشلنگنیدن بویان حاضرگچه۱۷ میلیون۶۸ مینگ کیشی اوشبو حجتنی آلگن. فقطگینه طالبلر حاکمیتنی قۉلگه آلگنیدن کېین۱۱ میلیوندن آرتیق شخص تذکره ترقهتیلگن.
بوگون (دوشنبه، ۸ جدی) ملي احصائیه و معلوماتلر ادارهسی نینگ بیلدیریشیچه، الکترون تذکره آلگنلرنینگ۱۰ میلیون۶۲۱ مینگ نفری اېرککلر،۶ میلیون۴۴۷ مینگ نفری اېسه عیاللردیر.
مذکور اداره اېنگ کۉپ الکترون تذکرهلر کابل، هرات، قندهار، بلخ و ننگرهار ولایتلریده ترقهتیلگنینی بیلدیرگن.
ملي احصائیه و معلوماتلر ادارهسی نینگ قۉشیمچه قیلیشیچه، حاضرده مملکت بۉیلب، کابل نی هم قۉشگن حالده،۸۱ ته «آسان خدمت» و الکترون تذکره ترقهتیش مرکزی، شونینگدېک، بیرلشگن عرب امیرلیکلریده بیرته «آسان خدمت» مرکزی فعالیت یوریتماقده.
الکترون تذکره ترقهتیش جریانی ۱۳۹۷-ییل نینگ ثور آییده باشلنگن اېدی.
سابق حکومت دوریده اوشبو جریان نینگ دستلبکی باسقیچلریده «افغان» سۉزینی ملت صفتیده کیریتیش و اېتنیک گروهلر رۉیخطی الکترون تذکرهترقهتیش جریانیده جدّي بحث-مناظرهلرگه سبب بۉلگن.
حاضرده الکترون تذکرهلر پاسپورتلر کبی افغانستان نینگ سابق حکومتی لوگوسی بیلن ترقهتیلماقده.
