افغانستان خبرچیلر مرکزینینگ معلوماتیگه کۉره، ۲۰۲۵ییلده افغانستانده عامهوي اخبارات واسطهلری اېرکینلیگیگه قرشی۲۰۵ ته زۉروانلیک و حقوقبوزرلیک حالتی قید اېتیلگن.
مرکز بوگون (شنبه، ۶ جدی) بیلدیرگن گزارشیده بو حالتلر ایکّی ژورنالیستنینگ اۉلدیریلیشی، اوچ نفرینینگ جراحتلنیشی ۱۶۶ ته تهدید و۳۴ ته حبسگه آلیشنی اۉز ایچیگه آلیشینی بیلدیرگن.
افغانستان خبرچیلر مرکزی حاضرده بېش نفر ژورنالیست هنوز طالبان قماقلریده سقلنهیاتگنینی ایتگن.
مرکزنینگ تاکیدلشیچه، ژورنالیستلر اۉلدیریلگن یاکه یرهلنگن و پاکستانگه نسبت بېریلگن هجوملر بیلن باغلیق حالتلردن تشقری، باشقه برچه حالتلرنینگ مسووللری طالبان منصبدارلری و ادارهلری حسابلنهدی.
گزارشگه کۉره، طالبان تامانیدن ژورنالیستلر و یېتکرمهگه نسبتاً زۉروانلیک و اېرکینلیکنی بوزیش حالتلری۱۳ فایزگه آشگن.
مرکزنینگ قۉشیمچه قیلیشیچه، ۲۰۲۵ییلده افغانستاندهگی عامه وی اخبارات محیطی کېسکین نظارت و باستیریش آستیده بۉلیب، خبرچیلر و مستقل یېتکرمهلر اوچون وضعیت نهایتده قارانغو و چېکلاوچی بۉلگن.
سۉنگّی ۱۲ آی ایچیده طالبان نینگ یېتکرمهگه باسیمی ینه-ده کوچلی سانسور و بۉغیق محیطگه آلیب کېلگن.
شونینگدېک مرکز، «قماقدهگی خبرچیلردن مجبوري «اقرارلر»نی آلیش، عیال ژورنالیستلرنینگ حکمران حاکم (طالبان) یوقاری لوازملی رسمیلری اشتراکیدهگی مطبوعات انجمنلریده قتنهشیشینی منبع قیلیش یاکه جانلی اېفیردهگی مطبوعات انجمنلریده عیال ژورنالیستلرنینگ آوازینی اۉچیریش بولرنینگ برچهسی مملکت تاریخیده مثلی کۉریلمهگن قۉرقوو، بۉغیش و کېسکین جنسی کمسیتیش سیاستی نینگ نمونهلری حسابلنهدی دېگن».
افغانستان خبرچیلر مرکزی جانلی موجودات تصویرینی نمایش اېتیش منع اېتیلگنی نینگ ۲۰۲۵ییلده۲۳ ولایتگه یاییلگنینی یېتکرمهلر اوچون اساسي تهدیدلردن بیری دېب بهالهگن و بو بویروق نینگ قطعی اجرا اېتیلیشی کمیده۲۰ ته تلویزیون یاپیلیشیگه آلیب کېلگنینی بیلدیرگن.
گزارشگه کۉره، جاري ییلده ایکّی تلویزیون و ایکّی رادیو سیاسي و خوفسیزلیک سببلریگه کۉره یاپیلگن، قالگن یېتکرمهلر اېسه یاپیلیش خوفی آستیده قالماقده.
مرکزنینگ ایتیشیچه، طالبان مستقل یېتکرمهنی باستیریش بیلن بیر پیتده دولت عامه وی اخبارات واسطهلرینی اۉزینینگ «پروپاگند» واسطهسیگه ایلنتیرگن و بیریاقلهمه، یگانه تکصدارلیکنی ترغیب قیلیش اوچون مرکّب توزیلمهلرنی باشقرماقده.
افغانستان خبرچیلر مرکزی بو حالت ژورنالیستلر و یېتکرمهنینگ اساسي حقوقلری بوزیلیشی، بنیادي اېرکینلیکلرنینگ چېکلنیشی بارهسیده چوقور تشویشلر توغدیرهیاتگنینی همده افغانستانده سۉز اېرکینلیگی و مدیا رواجی کېلهجگینی جدّي خوف آستیگه قۉیهیاتگنینی تاکیدلهگن.
