منبعلرنینگ تهراندن ایتیشیچه، تخار ولایتینینگ سابق پولیس قوماندانی جنرال اکرام الدین سریعگه اویوشتیریلگن هجومده ینه بیر سابق حربي هم هلاک بۉلگن.
منبعلرگه کۉره، بو سابق حربي نینگ اسمی محمدامین الماس بۉلیب، جمهوریت دوریده اوردو کندک قوماندانی بۉلیب خدمت قیلگن. او کاپیسا ولایتی مرکزینینگ اصلی یشاوچیسی اېدی.
بیر منبع اطلاعات روزگه یوبارگن پیامیده، هجوم چهارشنبه کونی کېچقورون ساعت تخمیناً۷:۰۰ده (۳ جدی) تهران نینگ ولی عصر میدانیده، جناب سریع نینگ دفتری یقینیده صادر بۉلگنینی ایتگن.
منبع نینگ ایتیشیچه، اوشبو هجوم عاقبتیده اکرام الدین سریع و محمد امین الماس هلاک بۉلگن، ینه بیر کیشی جراحت آلگن.
اطلاعات روز اختیاریگه بېریلگن اودیو فایلده بیر شخص هجومچیلرنینگ سانینی اوچ-تۉرت نفر دېب تعریفلهیدی.
مذکور هجوم نینگ سببی حاضرچه نامعلوم و اېران رسميلری هم حاضرگچه بو بارهده ایضاح بېرمهگن.
بو واقعه شوندهی بیر پیتده یوز بېرگنکی، بیر نېچه آی اوّل هم اېراننینگ مشهد شهریده سابق جهادي یېتکچیلردن اسماعیل خانگه یقین بۉلگن بیر قوماندان اۉلدیریلگن اېدی.
اکرام الدین سریع ۱۳۹۹ ییلدن سابق حکومت قولهگونگه قدَر تخار ولایتی پولیس قوماندانی بۉلیب ایشلهگن. او بوندن آلدین بغلان ولایتی پولیس قوماندانی لوازمیده فعالیت یوریتگن.
طالبان افغانستانده قَیته حاکمیتنی قۉلگه آلگنیدن سۉنگ، جناب سریع اېرانده یشب کېلهیاتگن اېدی و ایتیلیشیچه، یقینده افغانستان سابق حربيلری نینگ اېراندهگی یشش مدتینی اوزهیتیریش بۉییچه موافقلشتیریش مسوولیتنی ذمّهسیگه آلگن.
اېران افغانستان نینگ سابق حکومتی ترکیبیدهگی اَیریم حربيلر و منصبدارلرنینگ یشش مدتینی اوزهیتیرگن. شونگه قرهمهی، اېراندن افغانستانگه دېپورت قیلینگن اَیریم سابق حربيلر طالبان تامانیدن حبسگه آلینگن و اَیریم حاللرده اۉلدیریلگن.
