بیرلشگن ملتلر تشکیلاتینینگ قاچقینلر ایشلری بۉییچه عالي کمیسارلیگی اوچ میلیون دالر مبلغ اجرهتیلگن ینگی دستور دایرهسیده، کېلگوسی ایکّی ییل ایچیده کنر، قندهار و دایکندی ولایتلریده اوچته ساغلیقنی سقلش مرکزی تشکیل اېتیشینی معلوم قیلدی.
اوشبو تشکیلات بوگون (سهشنبه، ۲ جدی) اعلان قیلگن بیاناتیده، مذکور ساغلیقنی سقلش مرکزلری قَیتیب کېلگنلر و ایچکی کۉچیریلگن شخصلرنی قۉللب-قوّتلش دایرهسیده قوریلیشینی، لایحه خرجتلری اېسه افغانستان بشردوستانه صندیغی حسابیدن قاپلنیشینی بیلدیردی.
بیاناتده ایتیلیشیچه، کنر ولایتیده قوریلهدیگن مرکز عمومي شفاخانه صفتیده فعالیت یوریتهدی و تخمیناً۱۵۰ مینگ کیشیگه خدمت کۉرسهتهدی.
مذکور تشکلات شونینگدېک دایکندی و قندهار ولایتلریده کلینیکلر قوریلیشینی، هر بیر کلینیک 45 مینگ نفرگه یقین اهالیگه طبي خدمت کۉرسهتیشینی معلوم قیلگن.
تشکیلاتنینگ معلوماتیگه کۉره، اوشبو لایحه آرقهلی جمعی۲۴۰ مینگدن آرتیق ضعیف قتلم نمایندهلری، جملهدن ایچکی کۉچیریلگنلر، قَیتیب کېلگن مهاجرلر و اولرنی قبول قیلهیاتگن جماعهلر فایده کۉرهدی.
بیرلشگن ملتلر تشکیلاتینینگ کمسارلیگی ۲۰۲۲-ییلدن بویان افغانستان بۉیلب۲۸ ته ساغلیقنی سقلش مرکزی برپا اېتیلگنینی، اولردن ۲۱ تهسی حاضرده فعال اېکنینی تأکیدلهدی.
تشکیلات ینگی تشبث آرقهلی افغانستانده، اینیقسه قَیتیب کېلگنلر و ایچکی کۉچیریلگنلر اوچون برقرار و جماعهگه اساسلنگن ساغلیقنی سقلش خدمتلریگه اېریشیشنی یخشیلش بۉییچه مجبوريتینی کوچهیتیریشینی بیلدیردی.
طالبان حاکمیتگه قَیتگنیدن سۉنگ، گلابل مالی یاردملرنینگ کمهییشی سبب افغانستانده ساغلیقنی سقلش خدمتلریگه اېریشیش چېکلنگن و کۉپلب طبیات مؤسسهلری فعالیتی تۉختهتیلگن.
جاري ییلده ایران و پاکستاندن قریب ایکّی میلیون مهاجرنینگ قَیتیشی ساغلیقنی سقلش خدمتلریگه بۉلگن باسیمنی ینه-ده کوچهیتیریب، موجود مرکزلرگه یوکلمهنی آشیرگن.
