خلق ارا قیزیل خاچ کمیتهسی افغانستان هنوزگچه دنیادهگی اېنگ آغیر انسانی بحراندن بیری بیلن یوزمه-یوز اېکنینی معلوم قیلدی.
مذکور تشکیلات بوگون (دوشنبه، ۱ جدی) اعلان قیلگن گزارشیده چېکلنگن تیریکچیلیک منبعلری، دایمي ایشسیزلیک و ساغلیقنی سقلش خدمتلریگه چېکلنگن اېریشیش کۉپلب عایلهلرنی تیریک قالیش چېگرهسیگه آلیب کېلگنینی تأکیدلهدی.
قیزیل خاچ کمیتهسینینگ بیلدیریشیچه، بوندهی شرایطده اېنگ ضعیف قتلملر جملهدن، تۉییب آوقتلنمهدیگن بالهلر، کېکسهلر، معلوللیگی بۉلگن شخصلر، عایله باشلیغی بۉلگن عیاللر و کوندهلیک ایشچیلر نامتناسب درجهده کۉپراق ضرر کۉرماقده.
شونینگدېک، تشکیلات زلزله، قورغاقچیلیک، سوو تاشقینلری و اقلیم اۉزگریشی اېکینچیلیک محصولاتلرینی یۉق قیلگنی، عایلهلرنی کۉچیشگه مجبور اېتگنی، اوی-جایلر و مهم زیرساختلرگه ضرر یېتکزگنی، آزیق-طعام خوفسیزلیگینی ینه-ده یامانلشتیرگنی، محلي جواب بېریش امکانیتلرینی چېکلهگنی و احتیاجلرنی کوچهیتیرگنینی قید اېتدی.
خلق ارا قیزیل خاچ کمیتهسی افغانستانلیکلرنینگ ایران و پاکستاندن چیقریب یوباریلیشی مسألهسیگه هم تۉختهلیب، اولرنینگ قَیتیشی ساغلیقنی سقلش، سوو، آزیق-آوقت و باشقه خدمتلرگه باسیمنی آشیرگنینی ایتدی.
تشکیلات عمومي حالده افغانستاندهگی بشردوستانه معمالر اقتصادي بېقرارلیک، اقلیم ضربهلری، مجبوري کۉچیش، اقتصادي چېکلاولر و خلق ارا همکارلیکنینگ کمهییشی بیلن باغلیقلیگینی تأکیدلهدی.
قیزیل خاچ کمیتهسی حیاتنی سقلب قالووچی یاردملرنی یېتکزیش، تیریکچیلیکنی تیکلشگه قرهتیلگن برقرار سعی-حرکتلر، معمالرنینگ اساسي سببلرینی برطرف اېتیش و افغانستانده برقرارلیک (چیدملیلیک)نی آشیریش حلی هم نهایتده ضرور اېکنینی اورغولهدی.
مذکور تشکیلات 2025 ییلده افغانستان اهالیسیگه تورلی ساحهلرده یاردم کۉرسهتگنینی و اولرنینگ چیدملیلیگینی آشیریشگه حرکت قیلگنینی معلوم قیلدی.
قیزیل خاچ کمیتهسیگه کۉره، بو ییل ایچیملیک سووی بیلن تأمینلش، برق انرژیسی، ساغلیقنی سقلش خدمتلری، تیریکچیلیکنی یخشیلش، پارتلاوچی مادّهلر تهدیدیگه قرشی کورهش ساحهلریده افغان خلقیگه یاردم کۉرسهتیلگن.
شونینگدېک، تشکیلات قَیتیب کېلگن مهاجرلر و زلزلهدن جبرلنگنلرگه یاردم بېرگنی، طالبان قماقخانهلر باشقرمهسی بیلن همکارلیکده 12 ته قماقخانهگه تشریف بویورگنی، محبوسلر بیلن یاپیق صحبتلر اۉتکزگنی همده طالبان رسميلری بیلن قماق شرایطلری و اولرنی یخشیلش مسألهلرینی محاکمه قیلگنینی بیلدیردی.
