پاکستان عامهوي اخبارات واسطهلرینینگ خبر بېریشیچه، پاکستاننینگ بلوجستان ایالتیگه قرهشلی چاغی اولسواللیگیده یوز بېرگن ترافیک حادثهده کمیده۱۱ نفر افغانستانلیک هلاک بۉلگن، ینه۹کیشی یرهلنگن.
دان گزیتهسی معلوماتیگه کۉره، اوشبو حادثه تیناوون کېچقورون (یکشنبه،۳۰ قوس) بلوجستان ایالتینینگ نوکندی حدودیده صادر بۉلگن. واقعه «وانت» روسوملی موترنینگ یانیلغی تشووچی تانکر بیلن تۉقنهشووی عاقبتیده یوز بېرگن.
پاکستان پولیسینینگ بیلدیریشیچه، افغانستان وطنداشلری ایران آرقهلی اروپاگه ناقانوني یۉل بیلن مهاجرت قیلیش اوچون آدم قاچاقی بیلن شغللنووچی اویوشگن ترماق یاردمی بیلن یۉلگه چیققن بۉلگن.
مذکور خبرگه کۉره، محلي اهالی بوگون تانگده هلاک بۉلگنلرنینگ جسدلرینی چیقریب آلگن، جراحتلنگنلر اېسه طبیات مرکزلریگه یېتکزیلگن.
نوکندیدهگی محلي شفاخانه داکترلری قربانلر و جراحتلنگنلر سانینی تصدیقلب، جراحتلنگنلرگه طبي یاردم کۉرسهتیلگنینی و اولرنینگ احوالی برقرار اېکنینی ایتگن.
پاکستان پولیسی دستلبکی تېرگاو نتیجهلریگه کۉره، حادثهگه تېزلیک معیاریدن آشیب کېتیشی سبب بۉلگنینی معلوم قیلگن.
شونینگدېک، پولیس رسميلرینینگ ایتیشیچه، ضرور حقوقي جریانلر یکونلنگچ، هلاک بۉلگنلر جسدلری و جراحتلنگنلر افغانستانگه یوباریلگن.
طالبان رسميلری حاضرچه اوشبو حادثهده افغانستان وطنداشلرینینگ هلاک بۉلگنی یوزهسیدن هېچ قندهی ایضاح بېرمهگن.
آلدین هم ایران و پاکستان آرقهلی اۉتووچی ناقانوني مهاجرت یۉللریده شونگه اۉخشش حادثهلرده افغانستان وطنداشلرینینگ هلاک بۉلگنی حقیده کۉپلب خبرلر بېریلگن.
سۉنگگی کونلرده اېسه اېرانگه ناقانوني یۉل بیلن اۉتماقچی بۉلگن بیر نېچه نفر افغانستان فقراسی چېگرهوي حدودلرده ساووق سببلی حیاتدن کۉز یومگنی حقیده هم خبرلر ترقهلگن.
