بیرلشگن ملتلر تشکیلاتینینگ خوفسیزلیک کېنگشی نینگ چېکلاولرنی کوزهتیش کمیتهسی اۉزی نینگ اېنگ سۉنگگی گزارشیده داعشنینگ خراسان بۉلیمی افغانستانده تخمیناً ایکّی مینگ نفر جنگچیگه اېگه اېکنینی معلوم قیلدی.
گزارشگه کۉره، داعش خراسان رهبریتی اساسن افغانستان نینگ پشتون قومیگه منسوب شخصلر قۉلیده، بیراق اونینگ جنگچیلرینینگ سلماقلی قِسمی مرکزي آسیا دولتلریدن چیققن.
گزارشده، شونینگدېک داعش خراسان پاکستان طالبان حرکتی (تیتیپی) و افغانستان طالبانیدن ناراضی بۉلگن اَیریم اعضالر بیلن فرصت پرستانه علاقهلرگه اېگه اېکنی قید اېتیلگن.
بیرلشگن ملتلر خوفسیزلیک کېنگشینینگ چېکلاولرنی کوزهتیش کمیتهسی داعش خراسان نینگ طالبان توزیلمهلری ایچیدهگی تأثیر درجهسی انیق اېمس، بیراق کېنگ کۉلملی دېب بهالنهیاتگنینی بیلدیرگن.
کمیته گزارشیده ایتیلیشیچه، داعش خراسان مرکزي آسیادن، اساسن تاجیکستان و اۉزبېکستان وطنداشلریدن عبارت 600 گه یقین کۉنگیللینی یالهگن.
بو شخصلرنینگ اَیریملری افغانستانگه کېلگن، اَیریملری اۉز مملکتلریده قالگن، باشقهلری اېسه اروپاگه یوباریلگنی ایتیلهدی.
کمیتهنینگ معلوماتیگه کۉره، اوشبو شخصلرنینگ اکثریتی ۱۷–۱۸ یاشلی یاشلر بۉلیب، اېنگ یاشی کتّهسی ۴۰ یاش اطرافیده.
کمیتهنینگ تأکیدلشیچه، بو شخصلرنینگ اوّل ترورچیلیک فعالیتی بیلن شغللنگنلیک تاریخی بۉلمهگن و اولر اساسن آنلاین دیني گروهلر آرقهلی داعش گه جلب اېتیلگن.
بیرلشگن ملتلر تشیکلاتی خوفسیزلیک کېنگشینینگ چېکلاولرنی کوزهتیش کمیتهسی، شونینگدېک، داعش وکیللری افغانستان نینگ محلي جماعهلری آرهسیده یاللش فعالیتینی کوچهیتیرگنینی، بونینگ مقصدی «اویقودهگی حجرهلر» ترماغینی یرهتیش و شو آرقهلی افغانستاندن تشقریده هجوملر اویوشتیریش صلاحیتینی آشیریش اېکنینی بیلدیرگن.
گزارشده ایتیلیشیچه، افغانستان نینگ شِمالی و پاکستان چېگرهلریگه یقین منطقهلرده داعش خراسان دیني مدرسهلریده بالهلرنینگ آنگینی زهرلهیاتگنی همده تخمیناً ۱۴ یاشلی بالهلر اوچون خودکوشلیک مشغولاتلرینی یۉلگه قۉیگنی حقیده خبرلر موجود.
کمیته گزارشیگه کۉره، ۲۰۲۵ ییلده افغانستانده داعش هجوملری سانی کمهیگن، بیراق بو گروه هنوز ماسلشووچن و برقرار بۉلیب قالماقده.
گزارشده شونینگدېک، طالبان افغانستاننینگ شمالي و شرقي منطقهلریده داعش خراساننینگ یشیرین مسکنلرینی تۉلیق یۉق قیله آلمهگنی قید اېتیلگن.
گزارشگه موافق، بیرلشگن ملتلر تشکیلاتی خوفسیزلیک کېنگشی اعضا دولتلری افغانستاندن کېلیب چیقهیاتگن اېنگ کتّه ترورچیلیک تهدیدی هنوز داعش خراسان اېکنینی بهالهماقده.
کمیته معلوماتیگه کۉره، داعش خراسان افغانستاندهگی شیعهلر، طالبان منصبدارلری و خارجي وطنداشلرگه هجوملرنی اوستوار وظیفه دېب بیلیشده دوام اېتماقده همده چېگره آرتی هجوملرینی عملگه آشیریش نیتی و امکانیتینی سهقلب قالگن.
گزارشده افغانستانده فعالیت یوریتهیاتگن باشقه ترورچی گروهلر جملهدن پاکستان طالبان حرکتی (تیتیپی)، بلوجستان آزادلیک حرکتی، شرقي تورکستان اسلامي حرکتی و باشقه ترورچی گروهلر موجودلیگی هم تیلگه آلینیب، اولرنینگ بارلیگی منطقه و جهان خوفسیزلیگی همده برقرارلیگی اوچون جدّي تهدید صفتیده بهالنگن.
طالبان حاضرچه بیرلشگن ملتلر تشکیلاتی خوفسیزلیک کېنگشینینگ داعش و باشقه ترورچی گروهلر حقیدهگی سۉنگگی گزارشیگه مناسبت بیلدیرمهگن.
بو گروه اوّلراق بیر نېچه بار افغانستانده داعش موجودلیگی حقیدهگی گزارشلرنی رد اېتیب، اوشبو گروهنی باستیرگنینی دعوا قیلگن.
