ایران ایچکی ایشلر وزیرلیگینینگ چېت اېل فقرالری و مهاجرلر ایشلری مرکزی رهبری نادر یار احمدینینگ ایتیشیچه، حاضرگه قدَر ایرانلیک ایش بېرووچیلر تامانیدن افغانستان وطنداشلریگه ایش رخصتنامهسی بېریش بۉییچه یوباریلگن۶ مینگته عریضه تصدیقلنگن و اولر اوچون ایش ویزهلرینی رسميلشتیریش جریانی باشلنگن.
ایرنا اخبارات آژانسی خبریگه کۉره، حاضرگچه ایرانلیک ایش بېرووچیلر تامانیدن افغانستان وطنداشلری اوچون جمعی۲۰ مینگته ایش رخصتنامهسی سۉراوی رۉیخطدن اۉتکزیلگن.
اونینگ قۉشیمچه قیلیشیچه، افغانستانلیک ایشچیلر ایش ویزهسینی آلگچ،۹ آی دوامیده ایرانده ایشلشلری ممکن، شوندن سۉنگ اۉز مملکتلریگه قَیتیب، او یېرده۳ آی قالیشلری شرط بۉلهدی.
ایران چېت اېل یشاوچیلری و مهاجرلر ایشلری مرکزی رهبری بو جریاندن کۉزلنگن مقصد خارجي وطنداشلر بندلیگینی ترتیبگه سالیش و ایران ایش بازارینینگ احتیاجلریگه جواب بېریش اېکنینی تأکیدلهدی.
ایران جاري قویاش ییلده تخمیناً ایکّی میلیون افغانستانلیک مهاجرنینگ رۉیخطگه آلیش ورقهلرینی بېکار قیلدی و اولرنی چیقریب یوباریش جریانینی باشلهدی.
۱.۵میلیوندن آرتیق افغانستانلیک مهاجرلر ایراندن چیقریب یوباریلگچ، بو مملکتده ایشچی کوچی یېتیشمسلیگی و بعضی فابریکه همده کارخانهلر فعالیتی تۉختهگنی حقیده خبرلر ترقهلدی.
شوندن سۉنگ، ایران رسميلری افغانستان وطنداشلری اوچون۲۰۰ مینگته ایش ویزهسی بېریلیشینی اعلان قیلدیلر.
حاضرگی پیتده افغانستان وطنداشلری اوچون ایرانگه ویزهلر بېریشنینگ عادتي جریانی تۉختهتیلگن.
