طالبلرنینگ صناعت و تجارت وزیرلیگینینگ معلوم قیلیشیچه، افغانستان و قیرغیزستان خصوصي سکتوری نمایندهلری تورلی ساحهلرده عمومي قیمتی۱۵۶ میلیون امریکا دالری بۉلگن تجارت شرطنامهسینی امضالهگن.
وزیرلیک ترقتگن بیاناتگه کۉره، اوشبو کېلیشوولر بوگون، (چهارشنبه ۲۶ قوس) افغانستان-قیرغیزستان تجارت علاقهلری کنفراسی دایرهسیده امضالنگن.
طالبلرنینگ صناعت و تجارت وزیری نورالدین عزیزينینگ ایتیشیچه، مذکور کنفراس امکانیتلر و معمالرنی انیقلش همده عملي چارهلر کۉریش مقصدیده تشکیل اېتیلگن.
اونینگ قۉشیمچه قیلیشیچه، ایکّی دولت اقتصادي جهتدن استراتژیک موقعگه اېگه، بیری جَنوبي و غربي آسیانی باغلاوچی یۉل، ایکّینچیسی اېسه مرکزي آسیا و آسيا اقتصادي اتفاقیگه کیریش دروازهسی حسابلنهدی.
قیرغیزستان اقتصاد و تجارت وزیری بکیت صدیکوف هم ایکّی دولت نینگ استراتژیک اهمیتیگه تۉختهلیب، قۉشمه سرمایه، ترانزیت و اۉز ارا سودانی رواجلنتیریش ضرورلیگینی تأکیدلهگن.
قیرغیزستان اقتصاد و تجارت وزیری تیناوون یوقاری مرتبهلی هیئت باشچیلیگیده کابلگه کېلیب، طالبلر رسميلری بیلن اوچرهشوو و مذاکرهلر اۉتکزگن.
مذکور تشریف دایرهسیده کابلده قیرغیزستان تجارت اتاقی آچیلگن و ایکّی دولت اۉرتهسیده تجارت علاقهلری کنفراسی اۉتکزیلگن.
طالبلرنینگ صناعت و تجارت وزیرلیگی، شونینگدېک، ایکّی دولت خصوصي سکتوری وکیللری آلتین، دارو-درمان، پایافزار، کانچیلیک و انرژی، ترانسپورت، اېکینچیلیک، قوریلیش و بانک ساحهسی بۉییچه اۉز ارا مذاکرهلر آلیب بارگنینی بیلدیرگن.
