بیر نېچه آی آلدین «زلاله هاشمی» نینگ یۉقالیشی حقیدهگی خبرلر اعلان قیلینگنیدن سۉنگ، «افغان یولدوزی» دستورینینگ سابق اشتراکچیسی و مملکتنینگ مشهور قۉشیقچیسی آریانا سعید خانیم هاشمی «تیریک و ساغلام» اېکنینی معلوم قیلدی.
آریانا سعید فیسبوکیده نشر قیلگن ویدیوده بوگون( چهارشنبه ۲۶ قوس) زلاله هاشمی بیلن گپلشگن و حاضر او خوفسیز جایده اېکنینی تیلگه آلگن.
جاري ییل نینگ جوزا آییده زلاله هاشمی یۉقالگنلیگی حقیدهگی خبرلر اعلان قیلینگن اېدی و احتمال او «اۉغیرلنگن» بۉلیشی ممکنلیگی ایتیلگن اېدی.
آریانا سعید بوگون نشر قیلگن ویدیوده خانیم هاشمی نینگ یۉقالیشینی رد قیلیب و او اوییدن قاچیب کېتگنینی بیلدیرهدی.
قۉشیقچی و «افغان یولدوزی» دستوری نینگ سابق حکمینینگ ایتیشیچه، زلاله هاشمینینگ اېری محسن، اونینگ اوییدن قاچیشی آرتیدن، اونی تاپیش مقصدیده عامهوي اخبارات واسطهلریگه یۉقالگنلیگینی بیلدیرگن.
آریاناسعید، زلاله هاشمی محسن بیلن تورموش قورگنیدن سۉنگ و حتی حاملهدارلیک پیتیده هم اېریدن دایمي کلتکلنیب، ظلم و کمسیتیش آستیده بۉلگنینی اظهار قیلدی.
اونینگ قۉشمچه قیلیشیچه، زلاله هاشمی اوچ ییل آلدین اېریدن اجرهشیشگه موفق بۉلگن، اما بعضی اجتماعي عادتلر و معمالر طفیلی قَیتیب اېری نینگ اوییگه کېلیشگه مجبور بۉلگن.
زلاله هاشمی نینگ یۉقالیشی حقیدهگی خبرلر اعلان قیلینگچ، کابلدهگی طالبان امنیه قوماندانلیگی سۉزلاوچیسی خالد زدران بو مسأله بۉییچه تېرگاو باشلنگنینی تیلگه آلگن اېدی.
اونینگ قۉشیمچه قیلیشیچه، موجود دلیللرگه کۉره، «زلاله هاشمی اختیاري روشده اویینی ترک اېتگن کۉرینهدی.»
زلاله هاشیمی ۲۰۱۷-ییلده ننگرهار ولایتیدن «افغان یولدزوی» دستوریده اشتراک اېتگن و پشتو همده فارس قۉشیقلرینی اجرا اېتیب مشهور بۉلگن اېدی. او اوشبو دستورده ایکّینچی اۉریننی اېگهلهگن اېدی.
