طالباننینگ عدلیه وزیرلیگی، اوشبو گروهگه قرهشلی یېرلرنی باسیب آلیشنینگ آلدینی آلیش و باسیب آلینگن یېرلرنی قَیتریش کمیسیونی سۉنگّی آلتی آی ایچیده مملکت بۉیلب قریب۷۶۱ مینگ جریب یېرنی «امیرلیک ملکی» صفتیده حل قیلگنینی معلوم قیلدی.
مذکور وزیرلیک بوگون (چهارشنبه ۲۶ قوس) اعلان قیلگن بیاناتیده ایتیشیچه، بو یېرلر کابل و مملکت نینگ ینه۳۳ولایتی حدودیده جایلشگن بۉلیب، یېرلرنی باسیب آلیشنینگ آلدینی آلیش کمیسیون رهبریتینینگ قرارلری اساسیده «امیرلیک ملکی» صفتیده تصدیقلنگن.
طالبان عدلیه وزیرلیگینینگ ایتیشیچه، قریب۲۹ مینگ جریب یېرگه عاید ایشلر باسیب آلینگن یېرلر بۉییچه مخصوص محکمهلرگه کۉریب چیقیش اوچون تاپشیریلگن.
وزیرلیکنینگ قۉشیمچه قیلیشیچه، سۉنگّی آلتی آی دوامیده۴ میلیون۱۶۷ مینگ جریبدن آرتیق عمومي ییلاو (چاروا اۉتلاوی) بادغیس ولایتی نینگ مرکزی و۱۰ ته تومنیده انیقلنیب، تصدیقلنگن همده یېر بانکیده رۉیخطگه آلینگن.
طالبان عدلیه وزیرلیگی بیر نېچته تورر-جای شهرچهلرینی هم «امیرلیک ملکی» دېب اعلان قیلگن. بو قرار تنقیدلرگه سبب بۉلگن و مینگلب عایلهلرنینگ اویسیز قالیشیگه آلیب کېلماقده.
یقینده طالبان غزنی ولایتی مرکزیدهگی نوآباد شهرچهسی نینگ بیر مینگ ۸۴۳ جریب یېرینی «امیرلیک ملکی» دېب اعلان قیلدی.
اطلاعات روزنینگ تېکشیروو گزارشیگه کۉره، اوشبو شهرچه ۳۲ یییل اوّل برپا اېتیلگن بۉلیب، حاضرده او یېرده قریب ۱۸ مینگ عایله یشهیدی.
غزنینینگ نوآباد شهرچهسی اهالیسینینگ ایتیشیچه، اولر بو شهرچهدهگی یېرلرنی ساتیب آلیب، کېین اولرنینگ اوستیگه اویلر قورگن، بیراق طالبان اولرنینگ بو یېرلرگه اېگهلیک حقوقینی تن آلمهگن و شهرچهنی بۉشهتیش حقیده بویروق چیقرگن. اطلاعات روز گزارشینینگ خلاصهلریگه کۉره، محلي اهالی نینگ حجت و دلیللری تۉغری و یېترلی درجهده کۉریب چیقیلمهگن
