۱۰ دسمبر خلق ارا انسان حقلری کونی مناسبتی بیلن تورکستان اېللری اۉقوو کلتور و یاردملشمه اویوشمهسی تامانیدن «۲۱-عصرده اونتیلگن انسان حقلری » ناملی کېنگ قمراولی تدبیر تشکیل اېتیلدی. دستورگه دولت ادارهلری نمایندهلری، سیاسي حزبلر، مدنی تشکیلاتلر، حقوقشناسلر، اکادمیسنلر همده مهمانلر کېنگ مقیاسده قتنهشدی.
تدبیر تورکستان ایللری اویوشمهسی نینگ باشلیغی هاشم همدم نینگ آچیلیش نطقی بیلن باشلندی. او انسان حقلرینینگ تاریخی، اهمیتی انسان شأنی و اېرکینلیگینینگ زمانوي جمعیتلر حیاتیدهگی اۉرنی حقیده فکر بیلدیریب، ظلم و باسیم آستیده یشهیاتگن خلقلرنینگ آوازینی اېشیتیش مهملیگینی تأکیدلهدی.
سۉنگ اوراسیا تورک اویوشمهلر فدراسیونی باشلیغی اسماعیل چنگیز و تورک دولتلری علاقهلری آق پارتی استانبول ولایت کېنگشی اۉرین باسری محمد شاهین سۉزگه چیقدیلر. اولر تورکي خلقلر دیاسپوراسی دوچ کېلهیاتگن معمالر، اجتماعي و حقوقي تۉسیقلر حقیده معلومات بېریب، اولرنی برطرف اېتیش یۉلیده کۉریلیشی ضرور بۉلگن چارهلرنی سنب اۉتدیلر.
عینی حالده زیتون بورنی تومنی حاکمی آدم اسلو خلق ارا انسان حقلری کونی اوستیده تۉختهلیب اېرکینلیک، تېنگلیک و عدالت تمایللرینینگ اهمیتینی اېسلهتدی. جناب حاکم بو کبی تشبثلرنینگ انسان حقلرینی حمایه قیلیش مدنیتینی رواجلنتیریشگه خدمت قیلیشینی تیلگه آلدی.
برنامه ایکّینچی بۉلیمیده «۲۱-عصرده اونیتیلگن انسان حقلری» موضوعیدهگی پانل بیلن دوام اېتدی. بیلیم یورت اۉقیتووچیلری، حقوق شناسلر و انسان حقلری فعاللری تاریخي جریانلردن تارتیب، بوگونگی جهانی معمالر مهاجرت، نزاعلر، عدالتگه اېریشیش، سۉز اېرکینلیگی و حقوق اوستوارلیگی کبی دالضرب موضوعلر یوزهسیدن اۉز فکرلری و علمي یاندشوولرینی اۉرتاقلشدیلر.
