اکثریتی سیاسي حزبلر رهبرلری و افغانستاننینگ سابق حکومتینینگ یوقاری مرتبهلی رسمیلریدن ترکیب تاپگن طالبان مخالفی اوچ سیاسي جریان اۉز ارا همکارلیک اعلان قیلدی.
«افغانستاننی قوتقریش بۉییچه ملي قرشیلیک عالي کېنگشی» نینگ مطبوعات سۉزلاووچیسی عبدالله قرلق بوگون (سهشنبه، ۱۸ قوس) بیر ویدیو پیامده ایتیشیچه، مذکور کېنگش «افغانستاننی قوتقریش بۉییچه ملي مجلس» و «ملي تینچلیک و عدالت حرکتی» بیلن همکارلیک بۉییچه کېلیشووگه اېریشگن.
اونینگ قۉشیمچه قیلیشیچه، بو جریانلر افغانستاندهگی بحراننی یېنگیب اۉتیش و برقرار تینچلیککه اېریشیش مقصدیده بیرلشگن.
اوشبو اوچ سیاسي جریان طالبان نینگ ینه حاکمیتگه قَیتیشیدن کېین، سورگونده یشهیاتگن بیر قطار سیاسي یېتکچیلر تامانیدن تشکیل اېتیلگن.
«ملي تینچلیک و عدالت حرکتی»نی افغانستان نینگ سابق تشقی ایشلر وزیری محمد حنیف اتمر توزگن.
«افغانستاننی قوتقریش بۉییچه ملي قرشیلیک عالي کېنگشی» و «افغانستاننی قوتقریش بۉییچه ملي مجموعهسی» اساسا جهادي حزبلر رهبرلریدن تشکیل تاپگن.
«افغانستان ملي قرشیلیک جبههسی «رهبری احمد مسعود، افغانستان اسلامي جمعیتی نینگ یېتکچی اعضاسی عطا محمد نور، افغانستان خلقی اسلامي وحدت حزبی رهبری محمدمحقق و جهادي رهبر عبدالرب رسول سیاف اوشبو ایکّی سیاسي جریاننینگ مهم اعضالریدن حسابلنهدی.
