ایران تشقی ایشلر وزیرلیگینینگ سۉزلاوچیسی اسماعیل بقایی، طالبان و پاکستان اۉرتهسیدهگی ترنگلیکنینگ دوام اېتیشیدن خواطر بیلدیرگن و «ایران اطرافیدهگی چېگرهلرده هر قندهی بېقرارلیک ضررلی حسابلنهدی» دېگن.
ایرنا خبر آژانسینینگ بیلدیریشیچه، بقایی بوگون (یکشنبه، ۱۶ قوس) مطبوعات انجمنیده، «بیز افغانستان و پاکستان اۉرتهسیدهگی ترنگلیکنینگ دوام اېتیشیدن جوده خواطردهمیز، چونکه بیرینچیدن، بیز هر ایکّله دولت بیلن مدني، تاریخي و دینی علاقهلرگه اېگهمیز، ایکّینچیدن اېسه عمومي چېگرهمیز بار؛ بو ایکّی قۉشنی دولت و هر قندهی بېقرارلیک البته ملي خوفسیزلیگیمیزگه هم ضرر کېلتیرهدی دېگن.»
اونینگ قۉشیمچه قیلیشیچه، ایران پاکستان و افغانستان مسوول رهبرلری بیلن علاقهده بۉلیب، هر قندهی یاردمنی تکلیف قیلیشگه، ترنگلیکنی کمهیتیریش و نزاعلرنی مذاکره یۉلی بیلن حل اېتیشگه تیار.
«بو یۉل دایمي یۉل دیر و بیز هر ایکّله تامان بیلن علاقهدهمیز. یقینده جناب دوکتور لاریجانی پاکستانگه قیلگن سفریده هم بو مسأله کۉتریلگن اېدی. افغانستان مسووللری بیلن تیلفون یاکه یوزمه-یوز اوچرهشوولرده هم بو مسأله محاکمه قیلیندی دېب قۉشیمچه قیلدی بقایی»
بقاییگه کۉره، ایران منطقوي همکارلری بیلن طالبان و پاکستان اۉرتهسیدهگی ترنگلیکنی کمهیتیریش یۉلینی تاپیش اوچون ملاقات قیلماقده.
طالبان و پاکستان چېگره قۉشینلری جمعه کېچهسی اسپین بولدک – چمن چېگره اۉتکزیش یۉلیده ینه بیر بار تۉقنشگن.
طالبان رسمیلرینینگ ایتیشیچه، پاکستان حربيلری افغانستان توپراغیگه هجوم قیلگن و طالبان کوچلری جواب بېرگن.
طالباننینگ محلي رسمیلری معلوماتیگه کۉره، پاکستان هجوملریده اسپین بولدکده کمیده تۉرت نفر تینچ اهالی و بیر نفر طالبان عسکری هلاک بۉلگن.
طالبان چمهسی ایکّی آی آلدین دېیرلی بیر هفته دوامیده تۉقنشووگه کیریشگن و کېین قطر و تورکيه واسطهچیلیگیده تینچلیک اۉرنهتگن اېدی.
شونگه قرهمهی، ایکّی تامان حاضرگچه قطرده، تورکيهده و سعوديه عربستانیده اۉتکزیلگن مذاکرهلرده کېلیشووگه اېریشه آلمهگن و ترنگلیکنی کمهیتیریش امکانی بۉلمهگن.
پاکستان، طالبان افغانستانده پاکستان طالبانی نینگ (تیتیپی) قوراللی گروهلریگه باشپناه بېرگن و بو گروه پاکستانگه قرشی افغانستان توپراغیدن فایدهلنماقده.
طالبان اېسه تیتیپینی پاکستاننینگ ایچکی معماسی دېب حسابلهیدی و بو گروهنینگ افغانستان طالبانی بیلن علاقهسی یۉقلیگینی بیلدیرهدی.
آخرگی تۉرت ییل ایچیده پاکستان اوردوسی بیر نېچه بار افغانستان توپراغیگه هجوم قیلگن و بو هجوملرنی تیتیپی اعضالرینی باستیریش مقصدیده عملگه آشیرگن.
