طالبلرسۉزلاوچیسینینگ اۉرین باسری حمدالله فطرت، تیناوون کېچه طالبلر و پاکستان اۉرتهسیده سپین بولدکده یوز بېرگن تۉقنشووده بیر طالب و تۉرت نفر تینچ اهالی هلاک بۉلگنینی تصدیقلهدی.
فطرت بوگون (شنبه، ۱۵ قوس) بیر ویدیو صحبتده ینه بېش کیشی جراحتلنگنینی معلوم قیلدی.
جمعهدن شنبهگه اۉتر کېچهسی ینه چمن-اسپین بولدک چېگره منطقهسیده طالبلر کوچلری بیلن پاکستان چېگره قۉریقچیلری اۉرتهسیده آتیشمه یوز بېردی.
محلي منبعلرنینگ اطلاعات روزگه ایتیشیچه، تۉقنشووده تۉرت تینچ اهالی و ایکّی طالب جنگچی هلاک بۉلگن، ینه تۉرت کیشی یرهلنگن.
طالبان ایچیدهگی بیر منبع آلدینراق، تۉرت تینچ اهالی پاکستان تامانیدن آتیلگن هاوان اۉقی عاقبتیده اۉلگن، ینه تۉرت کیشی جراحتلنگن دېب ایتگن اېدی. منبعگه کۉره، جراحت آلگن بیر عیال و بیر اېرکک نینگ احوالی آغیر.
خبرلرگه کۉره، تۉقنشوو سپین بولدک اهالیسی اوچون جدّي مادّي ضرر هم یېتکزگن.
طالبان نینگ تأکیدلشیچه، تۉقنشوونی پاکستان تامانی باشلهگن و کېین طالبان کوچلری جواب قَیترگن.
چمهسی ایکّی آی آلدین تامانلر بیر هفته دوامیده تۉقنشوو قیلگن و کېینچهلیک قطر همده تورکيه نینگ واسطهچیلیگی بیلن اۉت آچیشنی تۉختهتیش اعلان قیلینگن اېدی.
شونگه قرهمهی، قطر، تورکيه و سعوديه عربستانیده اۉتکزیلگن مذاکرهلرده حلیگچه یکوني کېلیشووگه اېریشیلمهگن و کېسکینلیک پسهیمهگن.
اوشبو ترنگلیک آرتیدن چېگره اۉتیش جایلری یاپیلگن، ایکّی مملکت اۉرتهسیدهگی تجارت اېسه تۉختب قالگن.
