قطرنینگ افغانستاندهگی اېلچیسی مردف القاشوطی ایشانچ یارلیغینی طالبلر باش وزیری ملا محمدحسن آخوندگه تاپشیردی.
طالبلر باش وزیری دفترینینگ اعلامیهسیگه کۉره، ملا محمدحسن آخوند بوگون (چهارشنبه، ۱۲قوس) ارگده بۉلیب اۉتگن بیر مراسمده قطر اېلچیسی ایشانچ یارلیغینی قبول قیلدی.
اوشبو اعلامیهده کېلیشیچه، مردف القاشوطی افغانستانده قطرنینگ اېلچیسی صفتیده ماموریتینی باشلهگنیدن خرسندلیک قیلگن.
القاشوطی قطر همده طالبلرنینگ علاقهسی کوچیتیریلیشی اوچون تلاش قیلیشینی تیلگه آلگن.
طالبلر باش وزیری قطر مذکور گروه بیلن قیین شرایطده همکارلیک قیلگنینی بیلدیرگن.
شونینگدیک ملاحسن آخوند قطر اېلچیسینینگ ایشی باشلهنیشی بیلن هر ایکّی مملکت اۉرتهسیده دیپلوماتیک علاقه کوچهیشیدن امید بیلدیرگن.
قطر دولتی قویاش جاری ییل میزان آیینینگ سۉنگیده مردف القاشوطینینگ افغانستانده تامالاختیار اېلچیسی صفتیده تعیینلهگن اېدی.
القاشوطی جنابلری بوندن آلدین افغانستانده قطر اېلچیخانهسینینگ کارداری عنوانیده ایشلهگن.
مردف القاشوطی خارجی دولتنینگ ایکّینچی اېلچیسی صفتیده اۉزینینگ ایشانچ یارلیغینی طالبان باش وزیریگه تاپشیرگن.
بوندن آلدین، چیننینگ افغانستاندهگی اېلچیسی جاوشینگ اۉزینینگ ایشانچ یارلیغینی طالبان باش وزیریگه تاپشیرگن اېدی.
