افغانستاندن تاجیکستانگه اویوشتیریلگن هجوم و اوچ نفر چین وطنداشینینگ اۉلدیریلیشی آرتیدن، طالبان تشقی ایشلر وزیری امیرخان متقی تاجیکستان تشقی ایشلر وزیری سراجالدین مهرالدین بیلن تیلفون آرقهلی گپلشدی.
طالبان تشقی ایشلر وزیرلیگی خبریگه کۉره بوگون (سهشنبه، ۱۱ قوس)، متقی صحبتده، «افغانستان و تاجیکستان یقینده سیاسي، اقتصادي و خوفسیزلیک ساحهلریده همکارلیک اوچون ایشانچلی محیط یرهتدی، اما اَیریم دایرهلر بو ایجابي جریاننی ضعیفلشتیریشگه حرکت قیلماقده.» دېب ایتگن.
طالبان تشقی ایشلر وزیری تاجیکستان توپراغیدهگی سۉنگگی خوفسیزلیک واقعهلری و چین وطنداشلرینینگ هلاک بۉلیشینی قارهلب، بو واقعهلرنی اچینرلی دېب اتهگن و منطقوي برقرارلیک اوچون همکارلیک مهملیگینی تأکیدلهگن.
متقی شونینگدېک، طالبان چېگره خوفسیزلیگینی کوچهیتیریشگه، قۉشمه تېرگاولر اۉتکزیشگه و هر قندهی هماهنگلیککه تیار اېکنینی، شونینگدېک، یاووز عناصرگه قرشی قۉشمه چارهلرنی ضرور دېب بیلیشینی بیلدیرگن.
طالبان تشقی ایشلر وزیرلیگی خبریگه کۉره، تاجیکستان تشقی ایشلر وزیری چېگره همکارلیگینی مستحکملشنی قۉللب-قوّتلهگن.
سراجالدین مهرالدین تاجیکستان طرفینینگ طالبان بیلن ایجابي ملاقات طرفداری اېکنلیگینی و «ایکّله مملکت اۉرتهسیدهگی مناسبتلرنی ضعیفلشتیریشگه اورینهیاتگن دایرهلرنی رد اېتیشینی» تأکیدلهگن.
تامانلر چېگره قۉشینلری بیلن منتظم علاقهلر، قۉشمه خوفسیزلیک همکارلیگی کمیتهلری و تخنیکي اوچرهشوولرنی دوام اېتتیریشگه کېلیشیب آلگنلر، شونده منطقه اۉزارا ایشانچ و برقرارلیکنی ینهده کۉریشی ممکن.
تاجیکستان جمهورلیک ریاستی تیناوون، اۉتگن هفته افغانستان توپراغیدن ایکّی هجوم عملگه آشیریلگنینی اعلان قیلدی.
تاجیکستان جمهوررییسی امام علی رحمان اوشبو هجوملرنی قتّيق قارهلهگن و مملکت رسميلریگه بوندهی هجوملرنینگ تکرارلنیشی نینگ آلدینی آلیش اوچون ثمرهلی چارهلر کۉریشنی بویورگن.
تاجیکستان تشقی ایشلر وزیرلیگی پنجشنبه کونی، افغانستان توپراغیدن اویوشتیریلگن قوراللی هجومده چین نینگ اوچ وطنداشی ختلان ولایتیده هلاک بۉلگن اېدی دېگن اېدی.
وزیرلیک خبریده هجوم «شاهین اسامالالسی» شرکتی خادملریگه نسبتاً اۉتکزیلگن و قورال-یراغ همده نارنجک تشووچی پهپاد ایشلهتیلگن دېگن اېدی.
تاجیکستان رسميلری ایکّینچی هجوم و اونینگ تفصیلاتلری حقیده حاضرچه معلومات بېرمهگن.
چین هم تاجیکستانده اوچ وطنداشینینگ هلاک بۉلگنینی تصدیقلهگن و اۉز وطنداشلریگه افغانستان–تاجیکستان چېگرهسی حدودینی ترک اېتیشنی توصیه قیلگن.
