امریکا قۉشمه ایالتلرینینگ ایچکی خوفسیزلیک وزیری کریستی نوئم واشنگتنده ایکّی نفر ملي گارد اعضاسیگه هجوم قیلیشده عیبلنگن رحمانالله لکنوال مملکتگه کیرگنیدن کېین رادیکاللشگنینی ایتدی.
اونینگ «انبیسینیوز» گه معلوم قیلیشیچه، تېرگاو نتیجهلری لکنوالنینگ توغیلگن ولایتی و او یېریدهگی جمعیت بیلن علاقه آرقهلی افراطیت غایهلرگه یقینلشگنینی کۉرستماقده. خوفسیزلیک اۉرگانلری حاضر هم اونینگ تنیشلری و عایله اعضالری بیلن صحبتلرنی دوام اېتتیرماقده.
۲۹یاشلی لکنوال اۉتگن هفته چهارشنبه کونی آق اوی یقینیده ایکّی نفر ملي گارد منصبداریگه قرشی اۉق اوزگن اېدی. اولردن بیری هلاک بۉلگن، ایکّینچیسینینگ احوالی آغیر اېکنی بیلدیریلدی.
لکنوال اصلی خوست ولایتیدن بۉلیب، سابق جمهوریت دوریده امریکا مرکزي استخباراتی (سیا) بیلن همکارلیک قیلگن. 2021 ییلده طالبان حاکمیتگه قَیتگچ، او «اتفاقداشلرنی قبول قیلیش» دستوری آرقهلی امریکاگه کۉچیریلگن.
اوشبو حادثهدن سۉنگ امریکا جمهور رییسی دونالد ترامپ افغانستانلیکلرنینگ مهاجرتی ایشلرینی کۉریب چیقیشنی وقتینچه تۉختهتدی و افغانستان پاسپورتیگه اېگه شخصلرنینگ امریکاگه سفرینی چېکلهدی. شونینگدېک، برچه افغان مهاجرلر، جملهدن گرین کارت اېگهلری بۉییچه قَیته تېکشیروو اۉتکزیشنی بویوردی.
