تاجیکستان جمهورلیک ریاستی اۉتگن هفته افغانستاندن بو مملکت توپراغیده ایکّی مرته هجوم عملگه آشیریلگنینی معلوم قیلدی.
بو مملکت جمهورلیک ریاستی دفترینینگ بوگون (دوشبنه ۱۰ قوس) نشر قیلگن اعلامیهسیده، اوشبو هجوملرده بېش کیشی اۉلدیریلگن و باشقه بېش نفر اېسه یرهلنتیریلگن دېگن.
تاجیکستان جمهور رییسی امامعلی رحمان اوشبو هجوملرنی قتّیق قارهگن دیر.
او مملکتینینگ بلند مرتبهلی رسمیلریگه بوندهی هجوملر تکرار بۉلیشینینگ آلدینی آلیش اوچون ثمرهلی چاره تدبیر کۉریشلرینی نظرده توتیشلرینی سۉرهگن.
تاجیکستان جمهورلیک ریاستی دفترینینگ اعلامیهسیده چین وطنداشی اۉلدیریلگنی حقیده بیرار نرسه دېیلمهگن.
تاجیکستان تشقی ایشلر وزیرلیگی پنجشنبه کونی افغانستان توپراغیدن اویوشتیریلگن بیر هجومده چیننینگ اوچ وطنداشی بو مملکتنینگ ختلان ولایتیده اۉلدیریلگنینی اعلان قیلگن اېدی.
بو وزیرلیک اوشبو هجوم «شاهین اسامالالسی» شرکتی خادملریگه نارنجک یوکلهگن پهپادلر آرقلی عملگه آشیریلگنینی بیلدیرگن اېدی.
تاجیکستان رسمیلری هنوزگچه ایکّینچی هجوم و اونینگ توری بارهسیده تفصیلات بېرمهگنلر.
طالبلر تشقی ایشلر وزیرلیگی تاجیکستانده افغانستان توپراغیدن چین یشاوچیلری هجوم آستیگه آلینگنینی قارهلب، بو هجوم هر تامانلمه تېکشیریلیشی اوچون تاجیکستان بیلن بوتونلهی همکارلیک قیلیشنی اعلان قیلگن اېدی.
چین هم اوچ وطنداشی تاجیکستانده اۉلدیریلگنینی تصدیقلب، وطنداشلریدن افغانستان و تاجیکستان چېگره منطقهسینی ترک قیلیشنی سۉرهگن اېدی.
