«افغانستان آزادلیک جبههسی» نینگ معلوم قیلیشیچه، کوچلری تیناوون (یکشنبه،۹ قوس) ساعت ۶:۰۰ لراطرافیده فاریاب ولایت مرکزی میمنه شهریده جایلشگن طالباننینگ امر به معروف و نهي از منکر ادارهسیگه هجوم اویوشتیرگن.
جبههنینگ بیلدیریشیچه، اوشبو هجوم نتیجهسیده طالبانگه تېگیشلی ایکّی نفر امر به معروف خادمی اۉلدیریلگن، ینه ایکّی نفری یرهلنگن.
جبههنینگ ایتیشیچه، هجوم طالباننینگ امر به معروف خادملری بنادن چیقهیاتگن وقتده عملگه آشیریلگن.
طالبان نینگ امر به معروف وزیرلیگی اېسه بوگون اېرتهلب اعلان قیلگن بیاناتیده بو هجوم برطرف اېتیلگنینی ادعا قیلگن.
وزیرلیک مطبوعات سۉزلاوچیسی سیفالاسلام خیبر ایکس ایجتیمای ترماغیده یازیشیچه، کېچه ساعت ۶:۰۰لر چمهسیده امر به معروف ادارهسیگه هجوم قیلماقچی بۉلگن بیر هجومچی مقصدیگه یېتمسدن قۉلگه آلینگن. او واقعه بۉییچه آرتیقچه تفصیلاتلر بېرمهگن.
«افغانستان آزادلیک جبههسی» طالبان نینگ امر به معروف باشلیغی هم هجوم نشانلریدن بیری بۉلگن، بیراق اونینگ تقدیری حاضرچه نامعلوم دېب تاکیدلهگن.
شونینگدېک جبهه، طالبان نینگ اوشبو باشقرمهدهگی خادملری هر کونی شو یېرده تۉپلنهدی و کېین اوچ-تۉرت کیشیلیک گروهلرگه بۉلینیب، «اینیقسه عیاللرنی بېزاوته قیلیش مقصدیده» میمنه شهریده ایلنهدیلر دیب علیحده تاکیدلهگن.
«افغانستان آزادلیک جبههسی» بوندن آلدین هم طالبان نینگ امر به معروف خادملریگه قرهتیلگن هجوملر حقیده خبر بېرگن اېدی.
جبههنینگ ایتیشیچه، طالبان امر به معروف خادملری «بد-حجابلیک» بهانهسی بیلن بیر گروه قیزلرنی کۉچهدن قۉلگه آلگنیدن کېین، بو خادملرنی نشانگه آلیشینی اعلان قیلگن.
