محلي منبعلر ایتیشیچه، طالبان دایکندی ولایتیدن بۉلگن بیر یاشنی مزار شریف شهرینینگ علی آبا منطقهسیده اۉققه توتیب اۉلدیرگن.
منبعلرنینگ ایتیشیچه، اوشبو یاشنینگ اسمی علیخان اکبری بۉلیب، (پنجشنبه ۶قوس) کونی طالبان کوچلری تامانیدن آلتی اۉق آتیلیب اۉلدیریلگن.
منبعلر معلوماتیگه کۉره، بو یاش آنهسی بیلن تارتیشگن و آنهسینینگ گذر وکیلیگه قۉنغیراق قیلیشی آرتیدن طالبان خادملری واقعه جاییگه یېتیب کېلگن.
منبعلرگه کۉره، بیر طالب اوشبو یاشگه آلتی اۉق اوزگن و برچه اۉقلر اونینگ کۉکرهگیگه تېگیب توشگن.
مذکور طالب نېگه اوشبو یاشنی آتیب اۉلدیرگنی انیق اېمس.
منبعلرگه کۉره، علیخان پیچاق بیلن قوراللنگن و طالب اۉزینی حمایه قیلیش اوچون اۉق اوزگن لیگینی ادعا قیلگن. باشقه بیر منبع اېسه علیخان طالباننینگ عایلهوي جنجلده ارهلشیشیدن غضبلنگن اېدی دېب ایتگن.
اما دایکندی سیاسی چهرهلریدن محمد زمان اطرافینینگ ایتیشیچه، طالبان بو یاشنی فقط «نېگه بیزنینگ آلدیمیزده بلند آواز بیلن گپیریهپسن» دېگن عیبلاو یوزهسیدن اۉققه توتیب اۉلدیرگن.
اونینگ قۉشیمچه قیلیشیچه، علیخان اکبری اونینگ جیینی بۉلیب، طالبان اونی آنهسینینگ کۉز اۉنگیده اۉققه توتگن.
اکبری عایله اعضالری، او امینالله مالي نینگ عمهکیسینینگ اۉغلی بۉلیب، اوچ ییل آلدین او و بیر نېچه قرینداشلری «سيوک و شیبر» منطقهسیده طالبان تامانیدن اۉلدیریلگن اېدی دېب ایتگن.
شو بیلن بیرگه، منبع علیخان عایلهسی «جسارت قیلالمهی»، اونینگ اۉلدیریلیشینی تېرگاو قیلیش اوچون عریضه بېره آلمهگن دېدی.
طالبان نینگ بلخ ولایتی امنیه قوماندانلیگی اوشبو یاشنینگ اۉلدیریلیشینی رد اېتگن.
بلخدهگی طالبان امنیه قوماندانلیگی سۉزلاوچیسی محمدعیسی وثیق اطلاعات روزگه ایتیشیچه: «بو ایش حقیقتگه تۉغری کېلمهیدی» و بوندهی قاتللیک صادر بۉلمهگن.
