دایکندی ولایتیده شیعه مذهبیگه منسوب دیني مدرسهلردن بیرینینگ استادیگه کۉره، «طالبلر امر به معروف» ادارهسی مامورلری تامانیدن کۉرسهتیلهیاتگن باسیم و بېزاریلیکلردن شکایت قیلیب، بومدرسهلرنینگ جدّي معمالرگه دوچ کېلگنینی ایتهدی.
اونینگ اطلاعات روزگه یوبارگن پیامیده، امر به معروف خادملری هر هفته رخصتسیز روشده دیني مدرسه طلبهلرینینگ اوتاقلریگه باستیریب کیریب، اولرنی سقاللری یۉقلیگی یاکه جوده قیسقه بۉلگنی اوچون بېزاوته و حقارت قیلهدیلر دېگن.
منبعگه کۉره، طالبان امربه معروف مامورلری شیعه علمالری و مراجع تقلیدنینگ صورتلرینی ییرتیب تشلهیدیلر و «بو صورتلرنی آسیش حرام» دېیه ادعا قیلهدیلر، حالبوکه شیعه عالِملری نظریده بو حرام اېمس.
استادنینگ ایتیشیچه، طالبلر اوزون سقال قۉییشنی «واجب» دېب بیلهدی، اما شیعه مرجع تقلیدینینگ فکریچه قیسقه سقال نینگ هېچ بیر معماسی یۉق.
اونینگ سۉزلریگه کۉره، طالبلر شیعه مدرسهلرنینگ برچه کتابلرینی تېکشیریب چیقیب، اَیریملرینی مصادره قیلیب کېتگن.
طالبلر شیعه دیني مدرسهلریگه کوچلی باسیم اۉتکزماقده و اولرنی «دولتده رۉیخطدن اۉتیشینگیز شرط» دېب مجبورلهماقده دېدی منبع.
اساسا سنّی مذهبلی بۉلگن طالبلر افغانستانده باشقه مذهبلر طرفدارلرینینگ دیني اېرکینلیکلرینی چېکلب کېلماقده.
سۉنگّی تۉرت ییل دوامیده قیزلر اوچون مکتب و بیلیم یورتلرینی یاپگن بو گروه، بونینگ اۉرنیگه دیني و جهادي مدرسهلرنی کېنگهیتیریشگه اعتبار قرهتگن.
بیر ییل آلدین طالبلر معارف وزیرلیگی دیني مدرسهلری سانینی۲۱ مینگ۲۵۷ ته دېب اعلان قیلگن اېدی.
