طالبلرنینگ تشقی ایشلر وزیرلیگی تاجیکستاننینگ ختلان ولایتیده اوچ نفر چین وطنداشینینگ اۉلیمیگه آلیب کېلگن هجومنی قارهلهدی.
طالبلر تشقی ایشلر وزیرلیگی مطبوعات سۉزلاوچیسینینگ اۉرینباسری ضیا احمد تکل بوگون (جمعه،۷ قوس) اعلان قیلگن بیاناتیده ایتیشیچه، اولر قربانلرنینگ عایلهلری، شونینگدېک چین و تاجیکستان حکومتلریگه همدردلیک بیلدیرهدی.
تاجیکستان تشقی ایشلر وزیرلیگی تیناوون، اوشبو مملکتنینگ ختلان ولایتیده افغانستان توپراغیدن اویوشتیریلگن قوراللی هجومده اوچ نفر چین وطنداشی هلاک اېتیلگینی معلوم قیلگن اېدی.
وزیرلیک نینگ ایتیشیچه، هجوم «شاهین اسامالالسی» شرکتی خادملریگه قرشی اۉقاتر قورال و نارنجک تشووچی پهپاد یاردمیده عملگه آشیریلگن.
طالبان تشقی ایشلر وزیرلیگی بیاناتیده قید اېتیلیشیچه، دستلبکی تېکشیرووگه کۉره، اوشبو هجوم منطقهده ترتیبسیزلیک و بېقرارلیک یرهتیش همده دولتلر اۉرتهسیده ایشانچسیزلیک اویغاتیشگه اینتیلهیاتگن گروهلر ایشی بۉلیشی ممکن.
اولر اوشبو هجوم سببلرینی انیقلش اوچون تاجیکستان بیلن تۉلیق همکارلیککه جملهدن، معلومات المشیش، تخنیکي کمک کۉرسهتیش و قۉشمه بهالش اۉتکزیشگه تیار اېکنلیگینی بیلدیرگن وزیرلیک.
تاجیکستان تشقی ایشلر وزیرلیگی هجوم آرتیدن طالباننی ایکّی دولتنینگ رسمي چېگرهلریده برقرارلیک و خوفسیزلیکنی تأمینلش اوچون ثمرهلی چاره-تدبیرلر کۉریشگه چقیرگن.
تاجیکستان تامانینینگ چېگره حدودلریده همکارلیک محیطی یرهتیش بارهسیدهگی اوزلوکسیز سعی-حرکتلریگه قرهمهی، قۉشنی مملکتده فعالیت یوریتهیاتگن جنایتکار گروهلر چېگرهدهگی وضعیتنی بېقرارلشتیریشگه قرهتیلگن حرکتلرنی دوام اېتتیرماقده دېب قۉشیمچه قیلدی مذکور وزیرلیک.
هجوم، سۉنگگی آیلرده طالبان و تاجیکستان اۉرتهسیدهگی ملاقات آرتیب، ایکّی تامان هیئتلری اۉز ارا سفرلر اویوشتیرهیاتگن اېدی بیر پیتده عملگه آشیریلدی.
طالبلرتامانی تاجیکستان حکومتی بیلن تۉلیق همکارلیکنی کفالتلهیدی و مذکور حادثه سببلرینی انیقلش اوچون معلومات المشیش، تخنیکي همکارلیک و قۉشمه بهالشگه تۉله تیار اېکنینی بیلدیرهدی.
