طالباننینگ لغمان و سمنگان ولایتلریدهگی محلي مسووللری، بو ایکّی ولایتده یوز بېرگن ترافیک حادثهلری عاقبتیده کمیده بېش کیشی اۉلگن و ینه ۱۱ کیشی آغیر و یېنگیل یرهلنگنینی بیلدیردیلر.
طالبان نینگ لغمان ولایتی امنيه قوماندانلیگینینگ معلوم قیلیشیچه، تیناوون (پنجشنبه،۶ قوس) اوشبو ولایتنینگ قرغهیی اولسواللیگیده رۉی بېرگن ترافیک حادثهسی نتیجهسیده، بیر عیال و بیر بالهنی اۉز ایچیگه آلگن حالده تۉرت کیشی جان بېرگن و ینه تۉرت کیشی اېسه یرهلنگن.
لغمان امنيه قوماندانلیگی مطبوعات سۉزلاوچیسی محمد یونس یوسفزی، حادثه جلال آباد – کابل عمومی یۉلی بۉییده «مارسدیس» روسوملی موترنینگ «کرولا» روسوملی موتر بیلن تۉقنشووی عاقبتیده یوز بېرگن دېب ایتگن.
اونینگ سۉزلریگه کۉره، یرهلنگنلر اۉز وقتیده ننگرهار ولایت شفاخانهسیگه یېتکزیلگن و اولرنینگ احوالی قانیقرلی.
طالباننینگ سمنگان ولایتی امنيه قوماندانلیگینینگ هم خبر بېریشیچه، تیناوون کېچقورون خلم اولسواللیگیده یوز بېرگن ترافیک حادثهسی نتیجهسیده بیر کیشی هلاک بۉلگن و بیر عیال شامل یېتّی کیشی جراحت آلگن.
سمنگان امنيه قوماندانلیگی مطبوعات سۉزلاوچیسی حشمتالله رحمانينینگ معلوم قیلیشیچه، حادثه بلخ – سمنگان عمومی قتناو یۉلیده «پاسو» روسوملی موترنینگ «آلتو» روسوملی موتر بیلن تۉقنشووی عاقبتیده یوز بېرگن.
اونینگ ایتیشیچه، جراحتلنگنلر خلم اولسواللیگی شفاخانهسیگه آلیب باریلگن و اولر نینگ احوالی یخشی دېیلگن.
اوشبو ترافیک حادثهلرینینگ سببی حلی اعلان قیلینمهگن.
افغانستانده هر ییلی یوزلب آدملر ترافیک حادثهلری عاقبتیده حیاتدن کۉز یومهدی و ینه یوزلب کیشی جراحت آلهدی. یۉللرنینگ یامان حالتی، یۉل بېلگیلری یېتیشمسلیگی و هیداوچیلرنینگ احتیاطسیزلیگی اوشبو حادثهلرنینگ اساسي عامللری صفتیده کۉرسهتیلهدی.
