بیرلشگن ملتلر تشکیلاتینینگ انسان حقوقلری بۉییچه مخصوص گزارشگری ریچارد بنت، امریکاده افغانستانلیک بیر کیشی تامانیدن اۉق اوزیلیشی بیلن باغلیق روشده بیر پیام نشر قیلیب؛ جنایتچی جوابگر بۉلیشی کېرهک، لېکن بوتون افغانستان جماعهسی بیر شخصنینگ حرکتلری اوچون جزالنمسلیگی لازم دېگن.
بنت ایکس صحیفهسیده یازیشیچه، «مېن راضیمن، جنایتچی جوابگر بۉلیشی کېرهک، لېکن بوتون افغانستان جماعهسی بیر شخصنینگ حرکتلری اوچون جزالنمسلیگی کېرهک. بو جوده عدالتسیز و عموماً معناسیز بۉلردی. ساووققانلیک حکمران بۉلیشی لازم.»
افغان ایوا تشکیلاتینینگ اساسچیسی و افغان مهاجرلرینی قَیته جایلشتیریش بیلن شغللنووچی سابق حربيلر اتفاقی فعالی شاون واندیور بیاناتیده شوندهی دېگن: «بیز هېچ قچان بیر عقلدن آزگن آدمنینگ حرکتینی بوتون جماعهگه ضرر یېتکزیش اوچون بهانه صفتیده ایشلشیگه یۉل قۉیمهیمیز.»
اونینگ قۉشیمچه قیلیشیچه، «هېچ کیم باشقهسی نینگ حرکتلری بیلن تعریفلنیشینی خواهلهمهیدی، شونینگ اوچون عامهوي اخبارات واسطهلری، سیلنگن رهبرلر، قرار قبول قیلووچیلر و باشقه تأثیر کۉرستووچی شخصلرنی افغانستان جماعهسینی بو شخصنینگ دهشتلی قراری آرقهلی ناتۉغری تصویرلهمسلیککه اوندهیمیز.»
افغانستانلیک یشاوچی ۲۹ یاشر رحمنالله لکنوال، ۲۰۲۱-ییل سپتامبر امریکاگه بارگن، چهارشنبه کونی واشنگتندهگی آق اوی یقینیده امریکا گارد ملی ایکّی عسکریگه اۉق اوزیب، اولرنی آغیر یرهلنتیرگن.
امریکا جمهور رییسی دونالد ترامپ، اوشبو هجومدن سۉنگ، جوبایدن دوریده امریکاگه کېلگن برچه افغانستانلیک یشاوچیلرنینگ مهاجرتی ایشلرینی قَیته کۉریب چیقیشنی بویوردی.
امریکا قۉشمه ایالتلری شهروندی و مهاجرتی خدمتی افغانستان وطنداشلرینینگ مهاجرتی عریضهلرینی تۉختهتگن.
اوشبو اداره (پنچشنبه کونی ۶ قوس) ایکس پلاتفورمیده یازگن پیامیده: «حاضرگی وقتدن باشلب، خوفسیزلیک پروتکللر و خوفسیزلیک تېکشیروولری کۉریب چیقیلمهگونچه، برچه افغانستانلیکلرنینگ مهاجرتی عریضهلرینی چېکلاوسیز تۉختهتهمیز. وطنیمیز و امریکالیکلرنینگ خوفسیزلیگی بیز نینگ یگانه اوستوار وظیفهمیز بۉلیب قالهدی.»
