آسترلیا پارلمان اعضاسی ریچارد مارلز، آسترلیا پارلمانی افغانستانده طالبان حاکمیتی آستیده هزارهلرگه نسبتاً تعقیب و زۉروانلیکلرنی رسماً تن آلگنینی بیلدیردی.
ریچارد مارلز بوگون( چهارشنبه ۵ قوس) فیسبوک صحیفهسیده، آسترلیا پارلمانی دوشنبه کونی کېچقورون هزارهلرنینگ آسترلیا جمعیتیدهگی مهم اۉرنینی، شونینگدېک افغانستانده طالبلر حکمرانلیگی آستیده اولرگه نسبتاً صادر بۉلهیاتگن تعقیب و زۉروانلیکلرنی تن آلگنی حقیده یازگن.
اونینگ قۉشیمچه قیلیشیچه، بو نتیجهگه اېریشیش جریانیده آسترلیاده یشاوچی هزارهلر بیلن همکارلیک قیلیش اونینگ اوچون فخردیر.
پارلمان اعضاسی هزاره فعاللریگه مراجعت قیلیب، «سیزلرنینگ سعی-حرکتلرینگیز و اوزلوکسیز ایزلنیشلرینگیز اوچون تشکر، دوشنبه کونی سیزلر بیلن یانمه-یان تورگنیمدن جوده خورسند بۉلدیم.»
ریچارد مارلز بو بارهده باتفصیل معلومات بېرمهگن.
بونگه قدَر هم بیر نېچته دولتلرنینگ پارلمانلری و محلي کېنگشلری عبدالرحمنخان دوریده همده اوندن کېین، طالباننینگ بیرینچی حکمرانلیگی دوریده هزارهلرگه قیلینگن ظلم و تعقیبلرنی تن آلگن اېدی.
طالبان حاکمیتگه قَیتگنیدن بویان هزارهلر کېنگ کۉلملی تعقیب و کمسیتیشلرگه دوچ کېلماقده. بو دور مابینیده طالبلر هزارهلرنی تیزیملی روشده سیقیب چیقریش، کمسیتیش و اولرنینگ یېرلرینی تارتیب آلیشده عیبلنماقده.
