پاکستان مدافعه وزیری خواجه آصف افغانستانلیک طالبلرنی «ترتیبسیز و بېقدر گروه» دېب اتهب، اسلامآباد اېندی بو گروهدن امید کوتمهیاتگنینی تیلگه آلدی.
او جیونیوز تلویزیونینینگ دستورلریدن بیریده قیلگن نطقیده، اولرگه (افغانستانلیک طالبالرگه) ایشانیش احماقلیک بۉلهدی دېگن. بیز اولر بیلن حرمت بیلن معامله قیلیشگه حرکت قیلدیک… اما اولر ایکّی اولادینی بغریگه آلگن توپراق نینگ حققینی ادا قیلمهدیلر.
بو قبیل سۉزلر افغانستان و پاکستان اۉرتهسیدهگی مذاکرهلر هنوز باشی بېرک کۉچهده قالهیاتگن بیر پیتده ینگرهدی. طالباننینگ ایتیشیچه، دوشنبه آقشام پاکستان اوردوسی افغانستانگه هجوم قیلگن.
طالبان معلوماتیگه کۉره، هجومده 10 نفر تینچ اهالی هلاک بۉلگن. طالبلر مطبوعات سۉزلاوچیسی ذبیحالله مجاهد بو هجومنی «جنایت» دېب اتهب، وقت کېلگنده جواب قَیتریلیشی ممکنلیگینی اظهار قیلگن.
اما پاکستان مدافعه وزیری طالبلر عیبلاولرینی رد اېتیب، اولرنی «اساسسیز» دېب بهالهدی.
خواجه محمدآصف «دولت صفتیده اگر ضرورت بۉلسه، بیز جواب چارهلرینی کۉرهمیز، لېکن هېچ قچان تینچ اهالیگه ضربه بېرمهیمیز» دېب قۉشیمچه قیلگن.
او پاکستان اوردوسینینگ حربي حرفهای لیگینی طالبلر بیلن سالیشتیرر اېکن، شوندهی قۉشیمچه قیلدی، «اولر بیزنینگ انتظاملی کوچلریمیزگه اۉخشش اېمس. هېچ قندهی ترتیب-قاعدهگه اېگه بۉلمهگن، دیني باغلیقلیککه هم اېگه بۉلمهگن ترتیبسیز گروه.»
آصفنینگ ایتیشیچه، پاکستان اوزاق وقت صبر قیلگن و توزهتوچن مذاکرهگه امید قیلگن، اما بو امیدلر اېندی سۉنگن.
«یخشیلیک کوتیش کېرهک، لېکن چېگرهدن اۉتیشسه، باشقه تاماننی انکار قیلمسلیک کېرهک اېدی. اېندی اېسه بیز اولرنی بوتونلهی اعتباردن چیقردیک، اولردن هېچ قندهی یخشیلیک کوتمهیمیز.» دېدی پاکستان مدافعه وزیری خواجه محمد آصف.
پاکستان مدافعه وزیرینینگ ایتیشیچه، تورکيه، چین، قطر کبی دۉست دولتلر منطقهده تینچلیک بۉلیشینی ایستشهدی، چونکه اونینگ عاقبتلری فقط پاکستانگه اېمس، برچه منطقه دولتلریگه تأثیر قیلهدی.
او شوندهی دېب قۉشیمچه قیلدی، «اگر تروریزم فابریکهسی یۉق قیلینسه و افغانستان خلقیگه تیریکچیلیک قیلیش امکانیتی بېریلسه، بو همهگه فایده. اما افغانستان طالبلر بو مملکت خلقی نینگ دشمنیدیر.»
پاکستان اوردوسی مطبوعات کاتبی احمد شریف چودری هم افغانستانگه هجوم قیلینگنینی رد اېتیب، طالبلر عیبلاولرینی اساسسیز دېب اتهدی.
اونینگ ایتیشیچه، پاکستان قیلگن برچه حربي عملیاتلرنی آچیق عملگه آشیرهدی و هېچ قچان تینچ اهالیگه قرشی یۉنهلتیرمهیدی.
چودری، افغانستان توپراغیدهگی تورلی ترور گروهلری منطقه و حتا خلقارا خوفسیزلیککه تهدید سالماقده دېب تیلگه آلدی.
شونینگدېک، او امریکا قوراللرینینگ افغانستانده قالگن قِسمی حاضر ترورچیلر قۉلیگه اۉتهیاتگنینی هم ایتیب اۉتدی.
چودرینینگ سۉزلریگه کۉره، افغانستانلیک طالبلرنینگ قَیسرلیگی بو گروه بیلن پاکستان طالبلری آرهسیدهگی فرقنی هم اۉچیریب یوبارماقده.
